Pentaqonun İranın enerji infrastrukturlarına mümkün yeni zərbələr üçün hərbi planlar hazırladığı bildirilir...
ABŞ Prezidenti Donald Trump İranla bağlı gələcək addımları milli təhlükəsizlik üzrə yüksəkvəzifəli komandası ilə müzakirə edib.
Poliqon xəbər verir ki, bu barədə CNN telekanalı mənbələrə istinadən məlumat yayıb.
Məlumata görə, görüş Donald Trampın Pekindən ABŞ-yə qayıtmasından bir neçə saat sonra prezidentin qolf klubunda keçirilib. Toplantıda ABŞ-nin vitse-prezidenti JD Vance, dövlət katibi Marco Rubio, Mərkəzi Kəşfiyyat İdarəsinin direktoru John Ratcliffe və xüsusi nümayəndə Steve Witkoff iştirak ediblər.
CNN-in məlumatında qeyd olunur ki, görüş zamanı konkret hansı məsələlərin müzakirə edildiyi açıqlanmayıb. Bununla belə, Donald Trampın bu həftənin əvvəlində milli təhlükəsizlik komandası ilə yenidən bir araya gələcəyi gözlənilir. “Axios” portalının məlumatına görə, növbəti görüşün çərşənbə axşamı keçirilməsi planlaşdırılır.
Mənbələrin sözlərinə görə, ABŞ Müdafiə Nazirliyi İranın enerji obyektləri və strateji infrastrukturlarına əlavə zərbələrin endirilməsi ehtimalı üçün müxtəlif hərbi planlar hazırlayıb. Bildirilir ki, yekun qərar prezident tərəfindən veriləcək.
Digər tərəfdən, İranın ABŞ ilə aparılan danışıqlardakı mövqeyində hər hansı dəyişiklik müşahidə olunmur. Tasnim News Agency İran Prezidenti Masoud Pezeshkianın açıqlamalarını yayıb.
Masud Pezeşkian bildirib ki, ABŞ və İsrail uzun illərdir İslam ölkələri arasında qarşıdurma yaratmağa çalışırlar. Onun sözlərinə görə, bu proses müxtəlif fikir ayrılıqları yaradan layihələr və qarşılıqlı etimadsızlığın artırılması vasitəsilə həyata keçirilir.
İran prezidenti əlavə edib ki, Tehran regionun İslam dövlətləri ilə mehriban qonşuluq prinsiplərinə əsaslanan səmimi və sabit münasibətlərin qurulmasında maraqlıdır.
Beynəlxalq müşahidəçilər hesab edirlər ki, Vaşinqton və Tehran arasında gərginliyin yenidən artması Yaxın Şərqdə təhlükəsizlik vəziyyətinə və qlobal enerji bazarına ciddi təsir göstərə bilər.
Poliqon.info
