ABŞ nümayəndəsi Ceff Lendri Nuuk şəhərinə gəlib, yaxın günlərdə “Qrenlandiyanın Gələcəyi” konfransında iştirak edəcək...
Poliqon xəbər verir ki, ABŞ prezidenti Donald Trump administrasiyasının Qrenlandiya üzrə xüsusi nümayəndəsi Ceff Lendri adanın paytaxtı Nuuk şəhərinə səfər edib. Bildirilir ki, amerikalı nümayəndə gələn həftə keçiriləcək “Qrenlandiyanın Gələcəyi” adlı beynəlxalq konfransda iştirak edəcək.
Məlumata görə, konfrans çərçivəsində Qrenlandiyanın siyasi və iqtisadi inkişaf perspektivləri, Arktika regionunda təhlükəsizlik məsələləri, enerji resursları, iqlim dəyişiklikləri və beynəlxalq əməkdaşlıq mövzuları müzakirə olunacaq. Tədbirdə müxtəlif ölkələrdən siyasətçilər, ekspertlər və biznes nümayəndələrinin iştirakı gözlənilir.
Ceff Lendrinin səfəri ABŞ-nin Arktika bölgəsinə artan marağı fonunda diqqət çəkir. Vaşinqton son illərdə Qrenlandiyanın strateji əhəmiyyətini dəfələrlə vurğulayıb. Ada zəngin təbii ehtiyatları, Şimal Buzlu okeanındakı mövqeyi və hərbi-strateji imkanları səbəbindən böyük dövlətlərin diqqət mərkəzindədir.
Xatırladaq ki, Donald Tramp prezidentliyi dövründə Qrenlandiyanın ABŞ tərəfindən alınması ideyasını irəli sürmüş və bu məsələ beynəlxalq rezonans doğurmuşdu. Həmin vaxt Danimarka və Qrenlandiya hakimiyyətləri adanın satılmasının mümkün olmadığını bəyan etmişdilər.
Analitiklər hesab edirlər ki, ABŞ nümayəndəsinin hazırkı səfəri Vaşinqtonun Arktikada geosiyasi mövqelərini gücləndirmək və regionda təsir imkanlarını genişləndirmək strategiyasının tərkib hissəsi kimi qiymətləndirilə bilər.
Poliqon.info
