Bakıətrafı ərazilərdə metro stansiyalarının tikilməsi məsələsi daim müzakirə olunur. Xüsusilə, Binəqədi, Yeni Günəşli, Xırdalan və Masazır kimi ərazilərə metro xəttinin çəkilib-çəkilməyəcəyi ictimaiyyəti maraqlandırır. Çünki vətəndaşlar bu ərazilərdən Bakının mərkəzinə iş üçün və digər məqsədlər üçün gəlirlər. Düşünürəm ki, ölkəmizdə hər bir vətəndaşın şəhərin istənilən yeri ilə ictimai nəqliyyat vasitəsilə əlaqəsi olmalıdır. Azərbaycan dövlətinin şəhər ətrafında yaşayan sakinlərin mərkəzə gəlmək imkanlarını məhdudlaşdırmaq kimi bir niyyəti yoxdur”.
Bu sözləri Pravda.az-a Milli Məclisin deputatı Müşfiq Cəfərov "Bakı Metropoliteni" QSC-nin sədri Vüsal Aslanov "ATV Aktual" verilişində səsləndirdiyi fikirlərə münasibət bildirərkən deyib.
Deputat vurğulayıb ki, hər bir vətəndaşın normal ictimai nəqliyyata tələbatı var və dövlət bunu təmin etmək üçün çalışır: “Nəqliyyatla bağlı alternativ variantlar mütləq olmalıdır. Təbii ki, hələ də nəqliyyat sistemimizdə müəyyən problemlər mövcuddur. Hazırda bu problemlərin həlli istiqamətində bəzi addımlar atılır, dövlət proqramları qəbul olunur. Metro ilə bağlı əsas problem ondadır ki, metro stansiyaları əsasən bir xətt üzrə açılır. Halbuki keçid stansiyaları düzgün təşkil olunsa, bu daha məqsədəuyğun olar. Bakının hansısa qəsəbəsindən şəhərin mərkəzinə gəlmək istəyən insanlar bir neçə avtobus dəyişməklə və ya şəxsi avtomobillə ünvana çata bilirlər. İnsanların mərkəzə gəlmələrinə maneə olmaqla şəhərin yükünü azaltmaq əvəzinə vəziyyəti daha da gərginləşdirməyə nail olunur”.
Aytəkin Qardaşova
