ain.az, Bizimyol portalına istinadən məlumatı açıqlayır.
Rusiyada müharibə şəraitində fəaliyyət göstərən iqtisadiyyat 2023-cü ilin əvvəlindən bəri ilk dəfə daralma ilə üzləşib.
Bizimyol.info xəbər verir ki, “Bloomberg” nəşrinin yaydığı məlumata görə, 2026-cı ilin birinci rübündə Rusiyanın ümumi daxili məhsulu (ÜDM) illik müqayisədə 0,2 faiz azalıb. Bu göstərici son üç ildə qeydə alınan ilk iqtisadi geriləmə hesab olunur.
Məlumata əsasən, iqtisadi zəifləmə prezident Vladimir Putinin Ukraynadakı müharibə fonunda iqtisadi artımın davam etdirilməsi ilə bağlı hədəflərinə ciddi zərbə vurub. Ekspertlər bildirirlər ki, yüksək faiz dərəcələri, bahalı kreditlər və artan büdcə yükü iqtisadiyyatda resessiya riskini artırır.
Rusiya prezidenti Vladimir Putin mart ayında iqtisadiyyatda guya 1,8 faiz artım olduğunu açıqlasa da, Mərkəzi Bank bu göstəricinin davamlı yüksəliş deyil, yalnız “müvəqqəti zəifləmənin azalması” olduğunu qeyd edib. Bankın qiymətləndirməsinə görə, iqtisadi göstəricilərə iş günlərinin azalması və sərt qış şəraiti də mənfi təsir göstərib. Xüsusilə tikinti sektorunda hava şəraiti səbəbindən ciddi ləngimələr qeydə alınıb.
Rusiya İqtisadi İnkişaf Nazirliyi də 2026-cı il üzrə iqtisadi artım proqnozunu aşağı salıb. Nazirlik əvvəlki 1,3 faiz artım gözləntisini 0,4 faizə endirib. Eyni zamanda, ölkənin büdcə kəsiri aprel ayında rekord həddə çatıb və ilk dörd ay ərzində illik plan göstəricisini artıq üstələyib.
Mütəxəssislərin fikrincə, Yaxın Şərqdəki gərginlik səbəbindən neft gəlirlərinin artması Rusiya büdcəsinə müəyyən dəstək versə də, bu amil iqtisadiyyatdakı ümumi zəifləməni qısa müddətdə aradan qaldırmağa kifayət etməyəcək.
Ölkədə əsas faiz dərəcəsi 2024-cü ildəki 21 faizlik pik həddən endirilsə də, hazırda 14,5 faiz səviyyəsində qalır. Bundan əlavə, vergilərin artırılması 2026-cı ilin əvvəlində daxili tələbatın zəifləməsinə səbəb olub. Bununla belə, mart ayında pərakəndə satışlarda 6 faizdən çox artım qeydə alınıb.
Məqalədə qeyd olunur ki, Rusiyanın Federal Antiinhisar Xidməti analitikləri qiymət artımı ilə bağlı açıq proqnozlar verməməyə çağırmağa başlayıb. Qurum hesab edir ki, belə açıqlamalar bazar iştirakçılarını qiymətləri artırmağa təşviq edə və istehlakçılar arasında əlavə tələbat yarada bilər.
Bizimyol.info
Hadisənin gedişatını izləmək üçün ain.az saytında ən son yeniliklərə baxın.
