Ajans.az xəbər verir ki, kvant fizikasının maraqlı tərəflərinə diqqət çəkən nəzəriyyəyə görə, reallıq hər saniyə milyardlarla fərqli istiqamətə ayrılır. Təsəvvür edin ki, verdiyimiz qərarlar sadəcə ehtimal deyil. Hər seçim əslində yeni bir kainatın yaranmasına səbəb olur. Oksford Universitetinin fiziki Vlatko Vedral elmi-fantastik filmi xatırladan bu fikri yenidən gündəmə gətirib. Vedralın nəzəriyyəsinə görə, kainat yalnız bir ssenaridən ibarət deyil. Əksinə, hər qarşılıqlı təsir nəticəsində minlərlə fərqli istiqamətə ayrılan böyük ehtimallar şəbəkəsidir. Yəni sizin hazırkı həyatınızla yanaşı, başqa bir şəhərdə yaşayan və ya arzuladığı peşədə çalışan başqa versiyalarınızın da mövcud olması mümkündür. Bu fikir kvant mexanikasında yer alan “Çoxlu Dünyalar” nəzəriyyəsinə əsaslanır. Həmin yanaşmaya görə, reallıq düz xətt üzrə inkişaf etmir, hər saniyə saysız-hesabsız yeni istiqamətlərə ayrılır. Vedral sosial mediada yayılan “müsbət düşünərək reallığı dəyişmək” kimi iddialara isə ehtiyatla yanaşır. Onun fikrincə, insanın sadəcə nəyisə çox istəməsi reallığı dəyişmək üçün kifayət deyil. Reallıq bizim fərqində olub-olmamağımızdan asılı olmayaraq, atomaltı səviyyədə baş verən proseslər nəticəsində formalaşır. Şüurun fövqündə baş verən hissəcik oyunu Atomdan kiçik hissəciklər klassik məntiq qaydalarına uyğun davranmır və eyni anda bir neçə vəziyyətdə ola bilir. Fizikada uzun illərdir qəbul edilən bu vəziyyət çox vaxt “müşahidəçi effekti” ilə əlaqələndirilirdi. Lakin Vedral bu məsələyə fərqli yanaşır. Onun sözlərinə görə, bir fotonun səthə toxunması və ya kosmosdakı toz hissəciklərinin toqquşması belə, insan müşahidəsinə ehtiyac olmadan reallığın fərqli istiqamətlərə ayrılması üçün kifayətdir. Məsələn, bir fotonun gün eynəyindən keçməsi və ya qarşısının alınması nəzəri olaraq iki fərqli reallığın yaranmasına səbəb ola bilər. Kainatdakı bütün kvant qarşılıqlı təsirlərini nəzərə alsaq, hər an sonsuz sayda yeni versiyalarımızın yarandığını düşünmək mümkündür. Bu isə bir yerdə sizdən daha xoşbəxt, daha varlı və ya tamamilə fərqli seçimlər etmiş başqa “siz”lərin yaşadığı anlamına gələ bilər. Mövcud texnologiya ilə bu kainatlar arasında səyahət etmək və ya həmin versiyalarla əlaqə qurmaq mümkün deyil. Nəzəriyyəni tənqid edənlər konkret sübutun olmadığını deyərək bunu fiziki həqiqətdən çox fəlsəfi yanaşma hesab edirlər. Buna baxmayaraq, nəzəriyyənin riyazi baxımdan uyğun görünməsi bir çox alimlərin bu fikrə ciddi yanaşmasına səbəb olur. Ola bilsin ki, kainat düşündüyümüz kimi insan mərkəzli sistem deyil, sadəcə bir-biri ilə toqquşan hissəciklərin yaratdığı sonsuz ehtimallar okeanıdır.
