Qısa xatırlatma üçün qeyd edək ki, Fidan Loğman qızı Abbasova bir neçə ildir SOCAR-ın sabiq vitse-prezidenti Mikayıl İsmayılovun oğlu Orxan İsmayılzadəyə qarşı məhkəmə iddiası ilə çıxış edir.
Belə ki, Fidan Abbasova Orxan İsmayılzadə ilə uzun müddət birgə yaşayıblar və onların NİL adlı qızları var. Amma Orxan İsmayılzadə atalıqdan imtina edir və Nilin onun qızı olmadığını bildirir. Belə olan halda qarşı tərəf, yəni Nilin anası Fidan Abbasova məhkəməyə müraciət edərək “Atalığın müəyyən edilməsi” tələbi ilə Orxan İsmayılzadənin DNT testindən keçməsini tələb edir.
Və bu iddia ilə bağlı 2017-ci ildə Sabunçu Rayon Məhkəməsində keçirilən məhkəmə prosesində Adəm Məmmədov Fidan Abbasovanın vəkili olub.
Lakin Fidan Abbasova öz vəkili Adəm Məmmədovdan narazı qalıb və bunu müxtəlif saytlara, mediaya açıqlmasında qeyd edib.
Fidan Abbasova öz açıqlamasında vəkili Adəm Məmmədova 10000 dollar ( on min ) verdiyini, Adəm Məmmədəovun isə qarşı tərəfin xeyrinə çalışdığını, vəkili vasitəsi ilə ona saxta barışıq sənədi imzalatdıqlarını və sonda qarşı tərəfin öz öhdəliklərinə əməl etmədiyini bildirib. Yəni Fidan Abbasovanın vəkili Adəm Məmmədov qarşı tərəfə işləyib.
Fidan Abbasovanın bu açıqlamaları vəkil Adəm Məmmədovun narazılığına səbəb olub. Və buna görə Adəm Məmmədov “Şərəf və ləyaqətin, işgüzar nüfuzun müdafiəsi, dəyən mənəvi zərəri ödənilməsi” iddiası ilə Nərimanov Rayon Məhkəməsinə müraciət edərək qarşı tərəfdən 50 min manat təzminat tələb edib.
Qısa xatırlatma üçün bu qədər.
İndi isə keçək əsas məsələyə.
Deməli vəkil Adəm Məmmədovun keçmiş müvəkkili Fidan Loğman qızı Abbasovaya qarşı “Şərəf və ləyaqətin, işgüzar nüfuzun müdafiəsi, dəyən mənəvi zərəri ödənilməsi” iddiası və 50 min manat təzminat tələbi ilə bağlı məhkəmə prosesi 2 ilə yaxındır, daha dəqiq desək 29.11.2024-cü il tarixdən bu günədək davam edirdi.
Belə ki, 29.11.2024-cü il il tarixdə Nərimanov Rayon Məhkəməsində hakim Nərgiz Tağıyevanın sədrliyi ilə vəkil Adəm Məmmədovun keçmiş müvəkkili Fidan Loğman qızı Abbasovaya qarşı “Şərəf və ləyaqətin, işgüzar nüfuzun müdafiəsi, dəyən mənəvi zərəri ödənilməsi” iddiası və 50 min manat təzminat tələbi ilə bağlı işə baxılıb.
Onu da qeyd edək ki, bu məsələyə ilk dəfə hazırlıq iclasında baxılanda Fidan Abbasovanın vəkilləri aidiyyət məsələsini qaldırıblar. Belə ki, vəkil Adəm Məmmədov Fidan Abbasovaya qarşı şərəf və ləyaqətin alçaldılması üzrə iddianı Nərimanov Rayon Məhkəməsinə təqdim edib. Fidan Abbasova isə Xətai rayonu ərazisində qeydiyyatda olmaqla oradakı mənzilində yaşayır. Buna görə də iddiaya aidiyyəti üzrə Xətai Rayon Məhkəməsində baxılmalıdır. Hakim Nərgiz Tağıyeva vəkillərin etirazını əsaslı sayıb və iddiaya baxılması üçün Xətai Rayon Məhkəməsinə göndərilməsi barədə qərar qəbul edib.
Sözün qısası, uzun prosesdən, ötür-ötür oyunundan sonra nəhayət Nərimanov Rayon Məhkəməsi Adəm Məmmədovun iddiasını əsaslı saymayıb və onun iddiasını rədd edib.
Hökmdən narazı qalan Adəm Məmmədov Bakı Apellyasiya Məhkəməsinə şikayət edib.
Və Bakı Apellyasiya Məhkəməsi birinci instansiya, yəni Nərimanov Rayon Məhkəməsini hökmünü qüvvədə saxlayıb.
Yenə hökmdən narazı qalan Adəm Məmmədov bu dəfə Ali Məhkəməyə kassasiya şikayəti edib.
İndi isə gələk son xəbərə.
NUH.az-a zəng edən Fidan Abbasova müxbirimizə bildirib ki, bu gün, yəni 14 may 2026-cı il tarixdə Ali Məhkəmə Adəm Məmmədovun kassasiya şikayətinə baxıb və yekun məhkəmə aktı çıxarıb:
Kassasiya şikayəti təmin edilməsin, qətnamə isə dəyişdirilmədən saxlanılsın.
Bununla da Fidan Loğman qızı Abbasovanın əməllərində və hərəkətlərində Adəm Məmmədovun işgüzar nüfuzuna xələl vurmaq və onun şərəf-ləyaqətini alçaltmaq niyyətinin olmadığı aşkar şəkildə sübut edilibdir.
NUH.az
