Bizimyol saytından alınan məlumata görə, ain.az bildirir.
Almaniyada yaranan kəskin kerosin qıtlığı milyonlarla aviasiya sərnişini üçün ciddi problemlər yarada bilər.
Bizimyol.info xəbər verir ki, Almaniyanın “WELT” nəşrinin yaydığı məlumata görə, vəziyyətin pisləşməsi nəticəsində təxminən 20 milyon sərnişin reyslərin ləğvi və uçuş sayının azalması ilə üzləşə bilər.
Alman Hava Limanları Assosiasiyasının rəhbəri Ralf Bayzel bildirib ki, yanacaq böhranı İran ətrafında baş verən hərbi hadisələr fonunda daha da dərinləşib və bu, mülki aviasiyanın sabit fəaliyyətini təhlükə altına salır. Onun sözlərinə görə, hazırkı şəraitdə bir çox aviaşirkətlərin fəaliyyəti iqtisadi baxımdan sərfəli deyil və nəticədə marşrut şəbəkələrinin ixtisarı qaçılmaz görünür.
Bayzel qeyd edib ki, 2026-cı il üçün ən yaxşı ssenari sərnişin axınında durğunluq ola bilər. Ən pis halda isə bəzi hava limanlarının buraxılış qabiliyyəti 10 faizədək azala bilər. Bu göstərici bütün Almaniya hava limanlarına tətbiq edildikdə, təxminən 20 milyon sərnişinin təsirlənəcəyi ehtimal olunur.
Məlumata görə, aviasiya sektorunda yanacaq xərcləri ən vacib maliyyə amillərindən biri hesab olunur. Normal şəraitdə kerosin xərcləri aviaşirkətlərin ümumi əməliyyat xərclərinin təxminən 30 faizini təşkil edir. Qiymətlərin daha da yüksəlməsi isə bir çox uçuşların rentabelliyini aradan qaldırır.
Problemin qlobal xarakter daşıdığı da vurğulanır. ABŞ-də oxşar çətinliklər səbəbindən məşhur aşağıbüdcəli “Spirit Airlines” aviaşirkətinin fəaliyyətini dayandırdığı bildirilir.
Hazırda Alman Hava Limanları Assosiasiyası sektora dəstək tədbirlərini müzakirə edir. Lakin resurs çatışmazlığı şəraitində əsas çıxış yolu kimi uçuşların optimallaşdırılması və bəzi reyslərin ixtisar olunması nəzərdən keçirilir.
Bizimyol.info
Hadisənin gedişatını izləmək üçün ain.az saytında ən son yeniliklərə baxın.
