BAKI. TurkicWorld:
Yaxın Şərqdə davam edən hərbi gərginlik İordaniyanın əsas gəlir mənbələrindən biri olan turizm sektoruna ciddi təsir göstərib.
TurkicWorld xəbər verir ki, rəsmi statistikaya əsasən, turizm sektoru İordaniyanın ümumi daxili məhsulunun 14 faizini təşkil edir. Bu sahədə birbaşa 60 min nəfər çalışır, əlavə olaraq isə təxminən 300 min nəfərin dolanışığı turizm sektorundan asılıdır.
Məlumata görə, ötən il İordaniyaya yeddi milyondan çox turist səfər edib və bu ziyarətlər ölkə iqtisadiyyatına 7,8 milyard dollar gəlir qazandırıb.
Petra Turizm İdarəsinin Komissarlar Şurasının sədri Adnan əs-Səvayr bildirib ki, ilin ilk iki ayı turizm baxımından olduqca uğurlu keçib. Onun sözlərinə görə, həmin müddətdə qədim Petra şəhərini 112 min xarici turist ziyarət edib.
Lakin regionda müharibənin başlaması ilə vəziyyətin kəskin dəyişdiyini deyən əs-Səvayr qeyd edib ki, münaqişənin təsiri dərhal hiss olunub. O bildirib ki, mart və aprel aylarında Petra şəhərinə gələn xarici turistlərin sayı 28-30 min nəfər arasında dəyişib.
Turizm nümayəndələri hesab edir ki, bölgədə təhlükəsizliklə bağlı narahatlıqlar turist axınının azalmasına səbəb olub və bu tendensiya İordaniya iqtisadiyyatına əlavə təzyiq yaradır.
