Ali Məhkəmədə yol qəzası törətməkdə təqsirləndirilərək və bəraət almış Mahir Məcidovun (adı, soyadı şərtidir) barəsindəki qərardan dövlət ittihamçısı tərəfindən verilən kassasiya protesti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Zaur Hüseynovun sədrliyi ilə keçirilən prosesdə qərar elan olunub.
Qərara əsasən, kassasiya protesti təmin edilməyib.
İttihama görə, hadisə 2022-ci ildə Oğuz rayonu Xaçmaz kənd avtomobil yolunda qeydə alınıb.
Belə ki, rayon sakini, Mahir Məcidov etibarnamə olmadan idarə etdiyi, digər şəxsə məxsus texniki cəhətdən saz “MTZ-82.1” markalı qoşqulu traktorla sözügedən yolla Sincan kəndi istiqamətində hərəkətdə olub. O, “Yol hərəkəti haqqında” Azərbaycan Respublikası Qanununun müvafiq maddələrinin tələblərini pozaraq yol hərəkəti üçün təhlükəsiz şərait yaratmayıb, həmçinin əks istiqamətli nəqliyyat axınlarını ayıran bütöv xətti kəsərək qarşı zolağa çıxıb.
Nəticədə qarşıdan gələn həmkəndlisinin idarə etdiyi “VAZ-2107” markalı avtomobillə toqquşma baş verib. Qəza zamanı minik avtomobilinin sürücüsü Kərəm Mədətov (adı, soyadı şərtidir) ağır xəsarətlər alıb. O, açıq kəllə-beyin travması, beyin toxumasının ağır dərəcəli əzilməsi, kəllə sümüklərinin sınıqları və digər çoxsaylı xəsarətlərlə hadisə yerində həyatını itirib.
Toplanmış sübutları qiymətləndirən Oğuz Rayon Məhkəməsi ittihamın əsaslı olması qənaətinə gələrək təqsirləndirilən şəxsi Cinayət Məcəlləsinin 263.2-ci maddəsi ilə təqsirli bilib və ona cəza təyin edib. Hökmdən isə həm təqsirləndirilən şəxs, həm zərərçəkmiş tərəf apellyasiya şikayətləri və dövlət ittihamçısı isə apellyasiya protesti verib.
İşə baxan Şəki Apellyasiya Məhkəməsi isə fərqli nəticəyə gəlib. Məhkəmə kollegiyası təqdim olunmuş sübutları yenidən araşdıraraq belə qənaətə gəlib ki, Mahir Məcidovun idarə etdiyi traktorla yol hərəkəti qaydalarını pozması və bunun nəticəsində zərərçəkmiş şəxsin ölümünə səbəb olması onun təqsiri kimi kifayət qədər sübuta yetirilməyib. Bu səbəbdən apellyasiya instansiyası birinci instansiya məhkəməsinin hökmünü ləğv edərək təqsirləndirilən şəxsə Cinayət Məcəlləsinin 263.2-ci maddəsi ilə bəraət verilməsi barədə qərar qəbul edib. Sonra dövlət ittihamçısı kassasiya protesti ilə Ali Məhkəməyə müraciət edib.
Kamal Məmmədov
