Dəniz bioloqu İnqrid Honkala, ölümlə həyat arasında olduğu anlarda yaşadığı qeyri-adi görüntüləri təsvir edib.
Ölkə.az xəbər verir ki, alim bu barədə "Mirror" nəşrinə verdiyi müsahibədə danışıb.
Onun sözlərinə görə, o, həyatı boyu üç dəfə kritik vəziyyətlə üzləşib: iki yaşında buzlu su ilə dolu çənə yıxılıb, 25 yaşında qəzaya düşüb, 52 yaşında isə əməliyyat zamanı təzyiqinin kəskin düşməsi nəticəsində ölüm təhlükəsi yaşayıb.
Alim bildirib ki, uşaq ikən suya yıxıldığı zaman şüurunun bədənindən ayrıldığını hiss edib. "Mən öz kiçik bədənimi suyun üzərində hərəkətsiz halda üzən gördüm. Həmin an özümü uşaq kimi deyil, saf şüur, dərketmə və işıq sahəsi kimi hiss edirdim. Nə zaman anlayışı, nə qorxu, nə də düşüncələr var idi. Əvəzində dünyadakı hər şeyin bir-biri ilə bağlı olduğuna dair dərin bir anlayış yaranmışdı", - deyə o əlavə edib.
Honkalanın sözlərinə görə, həmin vaxt o, işə gedən anası ilə əlaqə qura bildiyini hiss edib. Anası qəfil evə qayıdıb və qızını çənin içində tapıb. "Uşaqlara baxmalı olan dayə digər otaqda idi, radioya qulaq asırdı və nələr baş verdiyindən xəbərsiz idi", - deyə bioloq qeyd edib.
Digər iki hadisə zamanı da qadın eyni hüzur hissini yaşayıb, lakin bu dəfə prosesə müxtəlif görüntülər də əlavə olunub. Honkala iddia edir ki, o, şifahi nitqdən istifadə etməyən sirli və nurlu varlıqlarla söhbət edib.
Dəniz bioloqu həmçinin vurğulayıb ki, məhz bu təcrübələr onu elmə yönəldib: "Mən müşahidələr və tədqiqatlar vasitəsilə reallığın təbiətini anlamaq istədim. Uzun illər elmi karyerama diqqət yetirdim və mənəvi yaşantılarım barədə nadir hallarda açıq danışdım. Lakin zamanla belə bir qənaətə gəldim ki, elm və mənəviyyat bir-biri ilə ziddiyyət təşkil etməməlidir - onlar eyni sirri fərqli nöqteyi-nəzərdən araşdıra bilərlər".
Həmidə İbrahimova
