ain.az, Kulis.az saytına istinadən bildirir.
"Bizimlə bitir" (It Ends With Us) filminin baş rol ifaçıları Bleyk Layvli və Castin Baldoni 2024-cü ildəki çəkilişlərdən sonra başlayan məhkəmə çəkişməsini həll edərək razılığa gəliblər.
Kulis.az xəbər verir ki, bu razılaşma hər iki ulduzun ifadə verəcəyi gözlənilən məhkəmə prosesinə cəmi iki həftə qalmış baş tutub.
Hollivudda səs-küy yaradan bu hüquqi mübarizə 2024-cü ildə Layvlinin Baldonini cinsi qısnamada və hit filmin çəkiliş meydançasında ona qarşı qarayaxma kampaniyası aparmaqda ittiham edərək məhkəməyə verməsi ilə başlamışdı. Baldoni bu ittihamları rədd edərək qarşılıqlı iddia qaldırmışdı. Məhkəmə çəkişməsi Hollivud elitasının gizli həyatını, o cümlədən Layvli, Baldoni və onların məşhur dostlarının mesaj və e-poçt yazışmalarını üzə çıxarmışdı.
"Dinlənilməyə layiqdir..."
Bazar ertəsi hər iki aktyorun vəkilləri razılaşma barədə ortaq bəyanat yayaraq bildiriblər ki, sözügedən film "onu ərsəyə gətirmək üçün çalışan hər birimiz üçün qürur mənbəyidir".
"Məişət zorakılığından xilas olanların – və ümumiyyətlə, bütün xilas olanların – həyatına mənalı təsir göstərmək və məlumatlılığı artırmaq arxasında durduğumuz bir məqsəddir," - deyə bəyanatda qeyd olunub.
Daha sonra bildirilib:
"Prosesin çətinliklər yaratdığını qəbul edirik və xanım Layvli tərəfindən qaldırılan narahatlıqların dinlənilməyə layiq olduğunu anlayırıq. Biz iş yerlərində nalayiq davranışların və qeyri-məhsuldar mühitlərin olmamasına qətiyyətlə sadiq qalırıq".
Bəyanatın sonunda hər iki aktyorun "bu razılaşmanın məsələyə son qoyacağına və iştirak edən hər kəsin sülh şəraitində irəliləməsinə imkan yaradacağına ümid etdiyi" vurğulanıb.
Qarayaxma maşını və sındırılan ittihamlar
Məhkəmə Kolin Huverin ən çox satılan romanının ekranlaşdırılması olan filmin çəkiliş meydançasında baş verən qarşıdurmalardan qaynaqlanırdı. Layvli filmdə uşaqlıqda məişət zorakılığına şahid olan və illər sonra eyni vəziyyətə düşən gənc qadın Lili Blum obrazını canlandırır.
Layvlinin hüquq komandası Baldoni və onun "Wayfarer" kino studiyasını sosial mediadan və dost jurnalistlərdən istifadə edərək aktrisanın nüfuzuna xələl gətirməyi planlaşdırmaqda ittiham edirdi. Lakin bu sülh razılaşması hakimin Layvlinin iddiasındakı 13 ittihamdan 10-unu (qısnama və böhtan daxil olmaqla) rədd etməsindən təxminən bir ay sonraya təsadüf edir. Yerdə yalnız üç iddia - müqavilənin pozulması, qisas və qisas almağa kömək etmə qalmışdı və mayın 18-nə məhkəmə təyin edilmişdi.
Baldoninin əks-həmlələri
Layvlinin iddiasından qısa müddət sonra Baldoni aktrisaya, onun əri Rayan Reynoldsa və menecerlərinə qarşı böhtan iddiası qaldırmış, onların irəli sürdükləri yalan ittihamlarla onun karyerasını məhv etməyə çalışdıqlarını iddia etmişdi. O, həmçinin Layvlinin ittihamlarını dərc etdiyi üçün "New York Times" qəzetini də məhkəməyə vermişdi.
Lakin iyun ayında hakim Baldoninin də iddiasını rədd edərək bildirmişdi ki, onun komandası "Layvlinin hədələrinin qeyri-qanuni şantaj olduğunu kifayət qədər əsaslandıra bilməyib". Məhkəmə prosesindəki sübutlara hətta Layvli və musiqi ikonası Teylor Svift arasında Baldoni barədə mesajlaşmalar da daxil edilmişdi.
"Səsinizi çıxara bilərsiniz..."
Məhkəmənin ittihamların böyük hissəsini rədd etməsindən sonra Layvlinin vəkili Siqrid Makkouli bildirmişdi ki, aktrisa Hollivuddakı "qarayaxma maşınını" ifşa edib.
Layvli isə instaqramda məhkəmənin gedişatı ilə bağlı emosional bir paylaşım edərək bunları yazmışdı:
"Həyatımda ən son istədiyim şey məhkəmə idi, lakin mən bu iddianı həm özüm, həm də digərləri üçün şəxsi və peşəkar səviyyədə təhlükəsiz iş mühiti tələb etdiyimə görə üzləşdiyim və hələ də davam edən amansız qisas kampaniyasına görə qaldırdım. Ümid edirəm ki, məhkəmənin qərarı başqalarına da göstərəcək ki, nə qədər ağlasığmaz dərəcədə ağrılı olsa da, siz səsinizi çıxara bilərsiniz."
Mabel Matizin həbsi tələb olunur
Elə bil çay da susmuşdu - Mənzər Niyarlının hekayəsi
Jak Lakan: "Sevgi - olmayan bir şeyi olmayan birinə verməkdir..."
Hadisənin gedişatını izləmək üçün ain.az saytında ən son yeniliklərə baxın.
