Xartum hava limanına zərbələr regionda gərginliyi artırıb...
Poliqon xəbər verir ki, Sudan mediasının yaydığı məlumata görə, Birləşmiş Ərəb Əmirlikləri və Efiopiya Xartum beynəlxalq hava limanına və ətraf ərazilərə həyata keçirilən pilotsuz uçuş aparatları hücumlarında iştirakda ittiham olunur.
Rəsmi mənbələr bildirir ki, Sudan tərəfinin əlində dronların məhz Efiopiya ərazisindən buraxıldığını və onların BƏƏ istehsalı olan avadanlıqlarla təchiz edildiyini göstərən “təkzibedilməz sübutlar” mövcuddur. Hücumların nəticələri və dəyən zərərin miqyası barədə detallı məlumat verilməsə də, hadisənin paytaxtın əsas infrastruktur obyektlərindən birini hədəf alması xüsusi narahatlıq doğurub.
Hadisədən sonra Sudan hökuməti diplomatik addım ataraq Efiopiyadakı səfirini geri çağırıb. Eyni zamanda, rəsmi Xartum mümkün hərbi cavab variantını da istisna etməyib və regionda təhlükəsizlik vəziyyətinin daha da kəskinləşə biləcəyi barədə xəbərdarlıq edib.
Analitiklər qeyd edirlər ki, bu ittihamlar təsdiqlənərsə, Şərqi Afrika və Yaxın Şərq regionunda geosiyasi qarşıdurmanın yeni mərhələyə keçməsi ehtimalı artır. Xüsusilə də Sudan daxilində davam edən qeyri-sabitlik fonunda xarici müdaxilə iddiaları vəziyyəti daha mürəkkəbləşdirə bilər.
Müşahidəçilərin fikrincə, hadisə həm də pilotsuz uçuş aparatlarının müasir münaqişələrdə artan rolunu bir daha nümayiş etdirir və region ölkələri arasında qarşılıqlı ittihamların dərinləşməsinə səbəb ola bilər.
Poliqon.info
