Sanksiya altındakı gəminin hərəkəti regionda nəzarət mexanizmlərinin effektivliyini sual altına qoyur...
İrana məxsus mayeləşdirilmiş qaz (LPG) daşıyan “XAVIA” tankeri ABŞ Hərbi Dəniz Qüvvələrinin tətbiq etdiyi dəniz blokadasını yararaq marşrutunu davam etdirib.
Poliqon xəbər verir ki, bu barədə TankerTrackers monitorinq platforması məlumat yayıb.
Məlumata əsasən, təxminən üç həftə əvvəl ABŞ sanksiyaları altında olan və 9052331 IMO nömrəsi ilə qeydiyyata alınmış “XAVIA” gəmisi İranın Əsaluye limanında LPG yükləyərkən müşahidə olunub. Platforma bildirir ki, tanker daha sonra heç bir maneə ilə qarşılaşmadan blokada perimetrini keçərək açıq sulara çıxmağı bacarıb.
Son məlumatlara görə, gəmi iki gün əvvəl Oman sahillərinə yaxın ərazidə, Sohar limanı istiqamətində hərəkət edərkən avtomatik identifikasiya sistemi (AIS) vasitəsilə qeydə alınıb. Bu isə gəminin izlənilməsi və nəzarət mexanizmlərinin effektivliyi ilə bağlı suallar doğurub.
Ekspertlər qeyd edirlər ki, bu cür hallar ABŞ-ın regionda tətbiq etdiyi sanksiya və blokada siyasətinin icrası baxımından boşluqların mövcudluğunu göstərə bilər. Eyni zamanda, İranın enerji ixracını davam etdirmək üçün alternativ marşrut və üsullardan istifadə etdiyini ortaya qoyur.
Analitiklərin fikrincə, Hörmüz boğazı və ətraf sularda baş verən bu kimi hadisələr qlobal enerji bazarlarında qeyri-müəyyənliyi artırmaqla yanaşı, beynəlxalq ticarət təhlükəsizliyinə də birbaşa təsir edir. Mövcud vəziyyət regionda geosiyasi gərginliyin yeni mərhələyə keçə biləcəyinə işarə edir.
Poliqon.info
