Rusiyalı psixoloq Veronika Axmetova qadınların 40 yaşdan sonrakı psixoloji və sosial davranış modelləri ilə bağlı maraqlı fikirlər səsləndirib.
News365.az xəbər verir ki, o, yerli mediaya açıqlamasında bildirib ki, bu yaş dövründə bir çox qadında müstəqillik hissi daha da güclənir və bu, onların münasibətlərinə birbaşa təsir göstərir. Psixoloqun sözlərinə görə, bu dəyişimin əsas səbəbi keçmiş təcrübələr və yaşanmış emosional məyusluqlardır.
Axmetova qeyd edib ki, 40 yaşa qədər bir çox qadın müxtəlif münasibətlərdə məyusluqlar yaşayır və bu səbəbdən başqalarına güvənmək onlarda risk kimi qəbul olunmağa başlayır. Nəticədə insanlara arxalanmaq hissi yerini ehtiyatlı davranışlara verir.
Onun fikrincə, müstəqillik bəzən qoruyucu mexanizmə çevrilir və qadınlar emosional zərbə almamaq üçün yardım istəməkdən çəkinirlər. Bu isə bəzən onların sosial və ailə münasibətlərinə mənfi təsir göstərə bilir.
Psixoloq əlavə edib ki, cəmiyyətdə formalaşan “güclü və hər şeyi təkbaşına edən qadın” stereotipi də bu davranış modelini gücləndirən amillərdən biridir.
Axmetovanın sözlərinə görə, münasibətlərdə yaranan əsas problemlərdən biri də nəzarət ehtiyacıdır — yəni hər şeyi tək düzgün etmək istəyi. Bu isə tərəfdaşlıq münasibətlərində gərginlik yarada bilər.
O vurğulayıb ki, bu vəziyyəti dəyişmək üçün insanın daxili inamları üzərində işləməsi, etibar etməyi öyrənməsi və məsuliyyəti bölüşməsi vacibdir. Sadə vərdişlərin, məsələn, kömək istəmək və onu qəbul etməyin belə, emosional rahatlıq yaratdığı qeyd olunub.
Ekspert sonda bildirib ki, problem müstəqillikdən imtina etmək deyil, əksinə, müstəqilliklə etibarlı münasibət arasında balansın qurulmasıdır.
News365.az
