ABŞ-ın aşağı büdcəli iş modelini tətbiq edən hava yolu şirkəti “Spirit Airlines” bütün uçuşlarını ləğv edərək fəaliyyətini dərhal dayandırmaq qərarı qəbul edib.
“Spirit Airlines” tərəfindən yayılan açıqlamada, “2 may 2026-cı il tarixindən etibarən fəaliyyətimizi dərhal qüvvəyə minməklə nizamlı şəkildə dayandırma prosesinə başladığımızı bildiririk. Bu qərarı böyük təəssüf hissi ilə qəbul edirik”, — ifadəsinə yer verilib.
Bütün uçuşların ləğv edildiyi bildirilən açıqlamada müştəri xidmətləri servisinin artıq xidmət göstərmədiyi qeyd olunub.
Açıqlamada, “Son 34 il ərzində ultra aşağı büdcəli iş modelimizin sektor üzərindəki təsirindən qürur duyuruq və qonaqlarımıza daha uzun illər xidmət göstərməyi ümid edirdik”, — ifadəsi işlədilib.
Müştərilərin hava limanlarına getməməli olduğu bildirilən açıqlamada bilet iadəsi prosesinə dair məlumat verilib.
Açıqlamada fəaliyyətin dayandırılması prosesində təchizatçılarla əməkdaşlıq ediləcəyi vurğulanaraq, mövcud bütün alacaq tələblərinin iflas prosesi çərçivəsində nəzərdən keçiriləcəyi bildirilib.
Spirit-in baş icraçı direktoru Dave Davis son həftələrdə yanacaq qiymətlərində baş verən qəfil və davamlı artımın şirkəti bu nöqtəyə gətirdiyini bildirərək, “Biznesi davam etdirmək üçün yüz milyonlarla dollar əlavə likvidliyə ehtiyac var idi və bunu təmin edə bilmədik. Bu, son dərəcə üzücüdür”, — ifadələrini işlədib.
ABŞ administrasiyası ötən ay şirkətə 500 milyon dollarlıq kredit təklif etmiş, lakin bu həftə hökumət dəstəkli xilasetmə paketi ilə bağlı istiqraz sahibləri ilə aparılan danışıqlarda razılaşma əldə olunmamışdı.
Artan yanacaq xərcləri “son zərbəni” vurub
ABŞ mətbuatında yer alan xəbərlərdə şirkətin iflasının ölkədə onilliklər sonra ilk dəfə böyük bir hava yolu şirkətinin bazardan silinməsi anlamına gəldiyi vurğulanıb.
Xəbərlərdə bəzi böyük ABŞ hava yolu şirkətlərinin Spirit sərnişinlərinə dəstək göstərəcəklərini açıqladığına diqqət çəkilərək, bunlar arasında United Airlines, American Airlines və Frontier Airlines kimi şirkətlərin yer aldığı bildirilib.
Xəbərlərdə Spirit-in bazardan çəkilməsinin İrandakı müharibə səbəbindən onsuz da artan xərclər fonunda aviabiletlərin bahalaşmasına səbəb ola biləcəyi qeyd olunub.
Spirit Airlines-ın müharibədən bir neçə gün əvvəl iflasdan çıxış sazişi imzaladığını açıqladığı xatırladılan xəbərlərdə yanacaq qiymətlərindəki sıçrayışın şirkətə “son zərbə” olduğu bildirilib.
