ABŞ və İran arasında kövrək atəşkəs davam etdiyi bir vaxtda, İsrail rəsmisi İranın zənginləşdirilmiş uran ehtiyatları ilə bağlı açıqlama verib.
Turkustan.az xəbər verir ki, İsrail Müdafiə Qüvvələrində (İMQ) adı açıqlanmayan yüksək vəzifəli məmur yerli mediaya bildirib ki, əgər İran təxminən 400 kiloqram zənginləşdirilmiş uranı ölkədən çıxarmasa, davam edən münaqişə “böyük uğursuzluq” kimi qiymətləndirilə bilər.
Rəsmi qeyd edib ki, ABŞ–İran danışıqları uran ehtiyatlarının çıxarılması və zənginləşdirmə fəaliyyətlərinin dayandırılması ilə bağlı razılaşma ilə nəticələnməzsə, 40 gün davam edən münaqişə zamanı göstərilən səylər “boşa gedəcək”.
İsrail rəsmisinin sözlərinə görə, “Əgər nüvə məsələləri ilə bağlı məqsədlərimizə nail ola bilməsək, İranda gördüyümüz bütün işlər böyük bir uğursuzluq sayılacaq. İran rejimi yenidən nüvə proqramına fokuslana bilər.”
Aytən Yaşar/ Turkustan.az
