Almaniya son illərdə Rusiya enerji resurslarından asılılığı minimuma endirmək üçün neft və qaz idxalını demək olar ki, tamamilə dayandırıb.
Musavat.com-un məlumatına görə, macarıstanlı siyasi analitiklər isə bildirirlər ki, bu addım Kremlin reaksiyasına səbəb olub və nəticələri artıq Berlində hiss olunmağa başlayıb.
Onların iddiasına görə, Almaniya hazırda enerji təminatı baxımından ciddi çətinliklərlə üzləşir və bəzi hallarda alternativ mənbələr üçün qonşu ölkələrdən dəstək axtarır.
Enerji idxalından tam imtina iqtisadi baxımdan gözləniləndən daha ağır nəticələr doğurub. Hətta bəzi iddialara görə, Berlin müəyyən həcmdə Rusiya neftinin bərpası məsələsini də müzakirə etməyə məcbur qalıb.
Mövzu fonunda Şvedt şəhərində yerləşən və ölkənin yanacaq təchizatında mühüm rol oynayan neft emalı zavodu ilə bağlı vəziyyət diqqət çəkir. Bildirilir ki, zavodun əsas xammal təchizat xətlərindən birinin kəsilməsi ehtimalı araşdırılır.
Bundan əlavə, Rusiya tərəfi daha əvvəl Almaniyaya yönələn Qazaxıstan neftinin Drujba boru kəməri vasitəsilə tranzitinin dayandırıldığını açıqlayıb.
Qeyd edək ki, məsələ ilə bağlı rəsmi Berlin tərəfindən geniş açıqlama verilməyib və müzakirələr əsasən analitik rəylərə əsaslanır.
Musavat.com
