Cənubi Koreyanın Yondon bölgəsində qiymətli mineralın nəhəng yatağı aşkarlanıb. Söhbət 104,5 milyon ton həcmində illit ehtiyatından gedir...
Poliqon xəbər verir ki, Daily Galaxy resursunun məlumatına görə, illit neft hasilatı, akkumulyator tədqiqatları, farmasevtika və kənd təsərrüfatında istifadə olunan gil mənşəli mineraldır. Bu, indiyədək məlum olan ən böyük illit yatağı hesab olunur. Müqayisə üçün, Çində bu mineralın ehtiyatları 20 dəfə azdır – təxminən 5 milyon ton.
İllit geoloji baxımdan nadir olmasa da, geniş ictimaiyyət üçün az tanınan mineraldır. O, qumdaşı, lil daşı və şist kimi çökmə süxurlarda formalaşır və bütün qitələrdə rast gəlinir. Onu kommersiya baxımından fərqləndirən əsas xüsusiyyət isə bir materialda nadir hallarda birləşən xüsusiyyətlərin kombinasiyasıdır.
Mütəxəssislərin sözlərinə görə, illit fillosilikatlar ailəsinə aiddir və quruluş baxımından slyudaya bənzəyir. Hissəciklərinin diametri iki mikrondan kiçikdir. Bu incə laylı quruluş minerala çox yumşaq tekstura, təxminən 600 dərəcə Selsiyə qədər istiliyədavamlılıq, həmçinin ağır metalları udmaq və üzvi birləşmələri parçalamaq qabiliyyəti verir. Şişən gil növlərindən fərqli olaraq, illit nəmləndikdə ölçüsünü dəyişmir və sabit qalır.
Bu xüsusiyyətlər onu müxtəlif sahələrdə faydalı edir. İllit neft və qaz quyularının çökməsinin qarşısını alan qazma məhlullarında, kağız və boya istehsalında doldurucu kimi, həmçinin kosmetik və farmasevtik məhsullarda istifadə olunur.
2024-cü ildə Coatings jurnalında dərc olunan araşdırmada Yondon mənşəli illit tam bərk vəziyyətli litium-ion batareyalar üçün polimer əsaslı bərk elektrolitlərdə doldurucu kimi sınaqdan keçirilib. Optimal konsentrasiyada o, hazırda inkişaf mərhələsində olan digər materiallarla müqayisədə rəqabətqabiliyyətli nəticələr göstərib.
Tam bərk batareyalar ənənəvi elementlərdəki maye elektroliti bərk materialla əvəz edir ki, bu da təhlükəsizliyi artırmaq və enerji sıxlığını yüksəltmək potensialına malikdir. Bu texnologiya hələ geniş kommersiya tətbiqinə keçməsə də, illitin ilkin sınaqlardakı nəticələri yatağın əhəmiyyətini artırır.
Bununla belə, bu sahədə istifadə üçün illit ciddi emaldan keçməlidir. Fiziki emala üyüdülmə, ağardılma və səthin işlənməsi daxildir. Kimyəvi mərhələlər isə turşu ilə yuyulma və kristallaşmanı əhatə edir. Bundan əlavə, kalium və alüminium kimi komponentlər ayrılaraq müxtəlif tətbiqlər üçün uyğunlaşdırılır.
Yondon bölgəsi həm də illit sayəsində turizm məkanına çevrilib. Xüsusilə dəmir yolu stansiyası yaxınlığında yerləşən sağlamlıq mərkəzindəki illit saunaları ilə məşhurdur.
Qeyd edək ki, 2026-cı ilin mart ayında Cənubi Koreyanın Kanvon əyalətində yerləşən Sangdon volfram mədəni 30 ildən çox fasilədən sonra fəaliyyətini bərpa edib və hazırda ildə təxminən 640 min ton filiz emal edir.
Mütəxəssislərin fikrincə, illit strateji metal olmasa da, bu həcmdə ehtiyat Cənubi Koreya istehsalçılarına bir neçə sənaye sahəsi üçün etibarlı daxili mənbə yaradır və ölkənin Çindən gil mineralları idxalından asılılığını azaldır.
Poliqon.info
