Ursula fon der Lyayen xəbərdarlıq edib ki, münaqişənin nəticələri Avropada illərlə hiss oluna bilər...
Poliqon xəbər verir ki, bu barədə “Bloomberg” Agentliyi məlumat yayıb. Ursula von der Leyen Avropa Parlamentində Strasburq şəhərində çıxışı zamanı bildirib ki, İranla müharibənin nəticələri Avropa üçün uzunmüddətli iqtisadi və sosial təsirlərə səbəb ola bilər.
“Hamımızın üzləşməli olacağı daha bir sərt reallıq var: bu münaqişənin nəticələri aylarla, hətta illərlə hiss oluna bilər”, deyə Aİ rəhbəri bildirib.
Avropa İttifaqı rəhbəri qeyd edib ki, fevralın sonundan etibarən müharibə fonunda Aİ ölkələri əlavə olaraq 27 milyard avro həcmində fosil yanacaq idxalına vəsait xərcləyib. Bu artım enerji bazarlarında qeyri-sabitliyin və qiymətlərin yüksəlməsinin birbaşa nəticəsi kimi qiymətləndirilir.
Bundan əlavə, Bruegel analitik mərkəzinin hesablamalarına görə, Aİ ölkələri enerji qiymətlərinin artımından əhalini və biznesi qorumaq üçün 10 milyard avrodan çox vəsait ayırıb. Bu tədbirlər subsidiya proqramları, vergi güzəştləri və birbaşa maliyyə dəstəyi kimi mexanizmləri əhatə edir.
Ekspertlər hesab edir ki, müharibənin uzanması Avropanın enerji təhlükəsizliyi, sənaye istehsalı və inflyasiya səviyyəsi üzərində əlavə təzyiq yarada bilər. Xüsusilə enerji idxalından asılı olan ölkələr üçün bu risklər daha yüksək qiymətləndirilir və uzunmüddətli iqtisadi strategiyalara yenidən baxılması zərurəti yaranır.
Poliqon.info
