Tehran neft anbarları dolduqca tərk edilmiş obyektləri bərpa edir, köhnə tankerləri yenidən istismara qaytarır...
İran ölkə daxilində yığılıb qalan nefti saxlamaq üçün yeni yollar axtarır və bununla hasilatın məcburi şəkildə dayandırılmasının qarşısını almağa çalışır.
Poliqon xəbər verir ki, bu barədə The Wall Street Journal nəşri məlumat yayıb.
Məlumata görə, Tehran tərk edilmiş obyektləri bərpa edir, improvizə edilmiş konteynerlərdən istifadə edir və nefti dəmir yolu ilə Çinə göndərməyə cəhd göstərir. Bu qeyri-adi tədbirlər infrastruktur böhranını gecikdirmək və Hörmüz boğazı ətrafında qarşıdurma fonunda Vaşinqtonun təzyiq imkanlarını azaltmaq məqsədi daşıyır.
ABŞ ilə İran arasında davam edən qarşıdurma faktiki olaraq kimin daha tez geri çəkiləcəyi uğrunda yarışa çevrilib: Tehranın neft sənayesi, yoxsa qlobal enerji istehlakçıları. Adi ixrac kanalları ilə ölkədən çıxarıla bilməyən hər bir barrel neft ya rezervuarlara, ya gəmilərə, ya müvəqqəti saxlama yerlərinə yönəldilməli, ya da yerin altında qalmalıdır.
“Bloomberg” də “Kpler” şirkətinin məlumatlarına istinadən yazır ki, İranda xam neftin saxlanılması üçün yerlər sürətlə tükənir. Analitiklərin fikrincə, bu vəziyyət İranın may ayının ortalarına qədər gündəlik neft hasilatını əlavə 1,5 milyon barrel azaltmaq məcburiyyətində qala biləcəyi ehtimalını artırır.
“Vortexa” şirkətinin hesablamalarına görə, təxminən 155 milyon barrel İran nefti ya tranzitdədir, ya da dünyanın müxtəlif bölgələrində üzən anbarlarda saxlanılır.
İranın neft yükləmək üçün daha neçə boş tankerə çıxışının olduğu hələlik məlum deyil. Bununla belə, müşahidələr köhnə gəmilərin yenidən istismara qaytarıldığını göstərir. İzləmə sistemlərinin məlumatına əsasən, 2 milyon barrelədək neft daşıya bilən 30 illik VLCC tipli tanker ötən həftə Fars körfəzindən siqnal ötürməyə başlayıb. Halbuki həmin tanker sonuncu dəfə üç il əvvəl yük daşıyıb.
Poliqon.info
