BAKI, 27 aprel. TELEQRAF
Avropa İttifaqının (Aİ) Gürcüstandakı nümayəndəliyi səfir Pavel Qerçinski ilə Gürcüstanın xarici işlər naziri Maka Boçorişvili arasında baş tutan görüşlə bağlı açıqlama verib.
Teleqraf xəbər verir ki, bəyanatda Aİ-nin Gürcüstan üçün "qapılarının açıq olduğu" növbəti dəfə xatırladılıb.
Qeyd olunub ki, qurum rəsmi Tbilisini mövcud olan tarixi fürsəti əldən verməməyə çağırır:
"Avropa İttifaqı heç kimi öz ailəsinə daxil olmağa məcbur etmir. Biz Gürcüstan hakimiyyətini hələ də mövcud olan tarixi fürsəti qaçırmamağa çağırırıq. Eyni zamanda hesab edirik ki, Aİ-yə üzvlük ölkə üçün sülh və rifahın ən yaxşı təminatıdır".
Xatırladaq ki, bundan əvvəl Maka Boçorişvili ölkəsinin Avropa İttifaqı tərəfindən göstərilən təzyiq və təhdidləri qəbul etməyəcəyini bəyan etmişdi.
