ABŞ-nin İrana qarşı müharibədə xərclədiyi böyük həcmdə sursat Vaşinqtonun Çinlə mümkün qarşıdurma planlarını çətin vəziyyətə sala bilər.
Musavat.com xəbər verir ki, bu barədə "The Wall Street Journal" məlumat yayıb.
Qəzetin xəbərinə görə, Ağ Evdə bəzi rəsmilər getdikcə daha çox hesab edirlər: əgər yaxın perspektivdə Çin Tayvana müdaxilə etsə, ABŞ əvvəlcədən hazırladığı hərbi planları tam şəkildə həyata keçirə bilməyəcək.
Məlumata görə, 28 fevralda İranla müharibə başlayandan bəri ABŞ 1000-dən çox Tomahawk raketi buraxıb. Bundan əlavə, 1500–2000 arasında həyati əhəmiyyətli hava hücumundan müdafiə raketləri – THAAD, Patriot və Standard Missile sistemlərinə aid interceptorlar istifadə olunub.
Ekspertlər bildirirlər ki, bu ehtiyatların tam bərpası altı ilə qədər vaxt apara bilər. Bu isə Vaşinqtonda operativ hərbi planların yenidən nəzərdən keçirilməsi ilə bağlı müzakirələri gücləndirib.
Nəşrin yazdığına görə, administrasiyada əsas narahatlıq ondan ibarətdir ki, prezident Donald Tramp Tayvanı müdafiə etmək üçün orduya əmr verərsə, ABŞ ordusu kifayət qədər ehtiyat sursata malik olmaya bilər.
Müşahidəçilər hesab edirlər ki, İran cəbhəsində sərf olunan hər raket Sakit okeanda mümkün böyük qarşıdurmanın qiymətini artırır və Vaşinqtonun eyni anda iki böyük müharibəni aparmaq imkanlarını sual altına salır.
Musavat.com
