Tayvan ABŞ ilə ümumi dəyəri 208,77 milyard Tayvan(NT) dollarından (təxminən 6,6 milyard dollar) çox olan altı yeni əsas silah alışı müqaviləsi imzalayıb.
Musavat.com xəbər verir ki, məlumatı Focus Taiwan xəbər portalı yayıb.
Bildirilir ki, müqavilələr aprel ayında imzalanıb.
Portala görə, bu müqavilələr 123,5 milyard NT dolları (3,9 milyard dollar) dəyərində Amerika HIMARS çoxlu buraxılışlı raket sistemlərinin (MLRS), 73,89 milyard NT dolları (2,3 milyard dollar) dəyərində M109A7 Paladin özüyeriyən haubitsalarının tədarükünü və 5,32 milyard NT dolları (168 milyon dollar) dəyərində quru qüvvələrinin raket arsenalının doldurulmasını nəzərdə tutur.
Qalan üç müqaviləyə 5,13 milyard NT dolları (162 milyon dollar) dəyərində dəniz raketlərinin alınması, 910,45 milyon NT dolları (29 milyon dollar) dəyərində Tayvan-Amerika birgə iri çaplı sursat istehsalı və 22,87 milyon NT dolları (726.000 dollar) dəyərində inteqrasiya olunmuş hava hücumundan müdafiə sistemi ilə bağlı məsləhət xidmətləri daxildir.
Daha əvvəl Tayvanın İcraçı Yuanı (ən yüksək icra orqanı) adanın qanunverici orqanına növbəti səkkiz il ərzində yerli və xarici silah sistemlərinin alınmasını əhatə etmək üçün 1,25 trilyon NT dolları (təxminən 40 milyard dollar) məbləğində xüsusi müdafiə büdcəsi təklif etmişdi. Lakin müxalifət partiyaları daha çox məlumat tələb etmiş və silah alışı üçün yalnız 400 milyard NT dolları təsdiqləməyə nail olmuşdular. Bu büdcədəki digər maddələr üzrə müzakirələr davam edir. Adanın Müdafiə Nazirliyi ABŞ ilə yeni silah müqavilələrinin imzalanmasının müdafiə büdcəsinin müzakirəsini və qəbulunu sürətləndirməyə kömək edəcəyinə ümid edir.
Musavat.com
