Yaponiyada invaziv qamış qurbağalarının son onilliklərdə nəzərəçarpacaq dərəcədə böyüdüyü və bədən quruluşlarının dəyişdiyi müəyyən olunub.
Redaktor.az xəbər verir ki, bu nəticə Macquarie University alimlərinin apardığı araşdırmada ortaya çıxıb. Tədqiqatın nəticələri "Royal Society Open Science" jurnalında dərc olunub.
Araşdırmaya əsasən, Yaponiyanın cənubunda yerləşən Ishigaki Island adasında yaşayan qurbağalar digər bölgələrdəki həmcinslərindən xeyli iridir. Onların orta çəkisi 190 qrama çatır. Müqayisə üçün bildirilib ki, Avstraliyadakı populyasiyada bu göstərici təxminən 135 qramdır.
Alimlərin sözlərinə görə, ölçü və bədən quruluşundakı bu dəyişikliklər 100 ildən az müddətdə formalaşıb. Bu isə klassik təkamül nəzəriyyəsində qəbul edilən sürətdən daha yüksək hesab olunur.
Qamış qurbağası yüksək toksikliyi ilə tanınır. Növ vaxtilə kənd təsərrüfatı zərərvericilərinə qarşı mübarizə məqsədilə Avstraliyaya gətirilsə də, sonradan sürətlə yayılaraq yerli ekosistemlərə ciddi ziyan vurub. Bu qurbağalar güclü zəhər ifraz etdiyinə görə bir çox yırtıcı üçün təhlükəlidir.
Tədqiqatçılar bildiriblər ki, qurbağaların sürətlə böyüməsinin səbəbi hələ tam müəyyən edilməyib. Ehtimal olunan amillər arasında Yapon adasının rütubətli və yağıntılı iqlimi, həmçinin yırtıcıların təzyiqinin azalması göstərilir.
Mütəxəssislər hesab edirlər ki, bu nəticələr canlı növlərinin yeni mühitə düşünüldüyündən daha sürətli uyğunlaşa bildiyini göstərir.
NURİYYƏ
