İsrailin baş naziri Benyamin Netanyahu mərasimə qara palto geyinərək qatılıb və onun altından güllə keçirməyən jilet geyindiyi aydın görünüb.
Hafta.az yazır ki, İsraildə yayımlanan Kanal 11 xəbər verib: "Netanyahu şəxsi təhlükəsizliyi ilə bağlı narahatlıqlara görə məşəl yandırma mərasimində güllə keçirməyən jilet geyinib".
"Yedioth Ahronoth" qəzeti də Netanyahunun Herzl dağında keçirilən mərasimdə paltosunun altından güllə keçirməyən jilet geyindiyini yazıb. Qəzet bildirib ki, İrandan mümkün qisas almaqla bağlı narahatlıqlar səbəbindən Netanyahu üçün təhlükəsizlik tədbirləri son zamanlar xeyli artırılıb.
İsrail Baş Nazirinin Ofisi mətbuatda yer alan iddialarla bağlı heç bir açıqlama verməyib.
Televiziya görüntülərində Netanyahu solunda həyat yoldaşı Sara Netanyahu, sağında isə təşkilata rəhbərlik edən nəqliyyat naziri Miri Regevlə birlikdə dayanıb. Daha sonra bildirilib ki, Xavyer Miley də Netanyahunun yanında oturub.
28 fevralda İranla müharibə başlayandan bəri Netanyahu və İsrail hökumətindəki bir çox nazir sərt təhlükəsizlik tədbirləri altında fəaliyyət göstərir.
İsrail hakimiyyəti son iki ildə onlarla israillinin İran kəşfiyyatına casusluq etməkdə şübhəli bilinərək saxlanıldığını açıqlayıb. Lakin faktiki əməliyyatların aparılmadığı qeyd edilib.
Bu arada, Milli Təhlükəsizlik Naziri İtamar Ben-Qvirin mərasimdə Netanyahunun yanında yer verilməməsinə mənfi reaksiya verdiyi bildirilib.
“Maariv” qəzeti Ben-Qvirin və həyat yoldaşının yerlərini dəyişmək istənildikdən sonra mərasimi tərk etdiyini yazıb. Xəbərdə Ben-Qvirin Netanyahunun yanında oturmaq istədiyi, lakin nəqliyyat naziri Miri Reqevin onu digər nazirlərlə birlikdə oturdacağını deyərək etiraz etdiyi bildirilib.
Ben-Qvirə yaxın mənbələr qəzetə bildiriblər ki, "Miri Reqevin bunun bütün hökumət üzvlərinin iştirak etməli olduğu rəsmi mərasim olduğunu başa düşməməsi təəssüf doğurur".
Şahidlər Ben Qvirin və həyat yoldaşının mərasimi qəzəblə tərk etdiyini bildiriblər.
Hesabatda həmçinin bildirilir ki, Ben Qvirə digər nazirlərlə eyni səviyyədə yer verilib, lakin səhvən Xavyer Miley və onun nümayəndə heyəti üçün ayrılmış yerə oturub, odur ki, ondan həmin yeri boşaldaraq başqa yerə keçməsi istənilib.
