Sorğu göstərib ki, ABŞ-də seçicilərin böyük əksəriyyəti həm inflyasiya və yaşayış dəyəri ilə bağlı siyasəti, həm də İran istiqamətində atılan addımları sərt şəkildə tənqid edir...
Poliqon xəbər verir ki, NBC News telekanalının sifarişi ilə keçirilən rəy sorğusunun nəticələrinə əsasən, ABŞ Prezidenti Donald Trampın fəaliyyətinə dəstək səviyyəsi 37 faiz təşkil edir. Sorğu ölkədə iqtisadi vəziyyət, inflyasiya, yaşayış xərclərinin artması və İranla müharibə fonunda narazılığın gücləndiyini göstərib.
Məlumata görə, Trampın inflyasiya və gündəlik həyatın bahalaşması ilə bağlı siyasətinə dəstək daha da aşağı səviyyədədir. Belə ki, respondentlərin cəmi 32 faizi onun bu istiqamətdə fəaliyyətini bəyəndiyini bildirib. Amerikalıların təxminən yarısı isə bu sahədə dövlət başçısının işini qəti şəkildə bəyənmədiyini qeyd edib. Bu nəticə seçicilərin məhz sosial-iqtisadi məsələləri əsas narahatlıq mövzusu kimi gördüyünü ortaya qoyur.
Sorğuda ABŞ-nin İranla müharibə ilə bağlı siyasəti də ayrıca qiymətləndirilib. Nəticələrə əsasən, amerikalıların təxminən üçdə ikisi Tramp administrasiyasının bu münaqişə ilə bağlı addımlarını dəstəkləmir. Respondentlərin 54 faizi isə bu siyasətə qəti etiraz etdiyini bildirib. Bu göstəricilər göstərir ki, xarici siyasət və hərbi qərarlar da Ağ Ev üçün ciddi ictimai təzyiq mənbəyinə çevrilib.
Eyni zamanda, sorğuda iştirak edənlərin 61 faizi ABŞ-nin İranda əlavə hərbi əməliyyatlara getməməli olduğunu deyib. Respondentlərin 16 faizi yalnız hava zərbələrinin davam etdirilməsini mümkün variant hesab edib. Daha 23 faiz isə Vaşinqtonun quru qoşunlarının tətbiqi də daxil olmaqla müxtəlif hərbi variantları nəzərdən keçirməli olduğunu bildirib.
Müşahidəçilərin fikrincə, bu rəqəmlər ABŞ cəmiyyətində həm iqtisadi yükün, həm də Yaxın Şərqdəki hərbi qarşıdurmanın yaratdığı siyasi və sosial narahatlığın artdığını nümayiş etdirir. Xüsusilə yanacaq qiymətləri, yaşayış dəyərinin yüksəlməsi və uzunmüddətli hərbi risklər seçicilərin Tramp administrasiyasına münasibətinə birbaşa təsir göstərən əsas amillər kimi qiymətləndirilir.
Poliqon.info
