ABŞ-ın vitse-prezidenti Cey Di Vens Roma Papası XIV Leoya təşəkkürünü bildirib.
Bizim.Media xəbər verir ki, Vens X sosial şəbəkəsində pontifikin Donald Trampla mübahisə etmək istəmədiyini bildirməsinə münasibət bildirib.
Onun sözlərinə görə, Papa Leo açıqlamasında fikirlərinin ABŞ Prezidenti ilə yeni mübahisə başlatmaq cəhdi kimi qəbul olunmasına görə təəssüfləndiyini söyləyib.
“Papanın bunu deməsinə görə ona minnətdaram. Media daim münaqişələri qızışdırmağa çalışsa da və bəli, real fikir ayrılıqları olub və olacaq da, reallıq çox vaxt daha mürəkkəb olur. Papa Leo İncili təbliğ edir və bu da təbii olaraq aktual mənəvi məsələlərlə bağlı mövqeyini ifadə etməsi deməkdir. Prezident və bütün administrasiya isə bu mənəvi prinsipləri qarışıq dünyamızda tətbiq etməyə çalışır. O, dualarımızda olacaq və ümid edirəm ki, biz də onun dualarında olacağıq”, - deyə Vens yazıb.
Xatırladaq ki, Papa XIV Leo daha əvvəl Kamerunda çıxışı zamanı “dünyanı talayan bir ovuc tiran” ifadəsini işlətmişdi.
Pontifik son həftələrdə ümumilikdə ABŞ və İsrailin Yaxın Şərq siyasətini açıq şəkildə tənqid edib. O, Trampın “İranda sivilizasiyanı məhv etmək” təhdidini tamamilə qəbuledilməz adlandırıb. Papa, eyni zamanda, ABŞ müdafiə naziri Pit Heqsetin amerikalı əsgərlərin “İsa Məsihin adı ilə” qələbəsi üçün dua çağırışına da etiraz edib. Onun sözlərinə görə, hökmranlıq istəyi “İsa Məsihin yoluna yaddır”.
Bizim.Media
