Pekinin cənub-şərqində antropomorfik robotların iştirakı ilə ikinci irimiqyaslı yarım marafon start götürüb.
Publika.az xəbər verir ki, yarışda həmçinin 12 minə yaxın insan iştirak edir.
Ağıllı maşınlar yerli vaxtla saat 07:30-da İçjuan rayonunda qaçışa başlayıblar. Robotlar məsafəni insanlarla birlikdə, lakin onlar üçün ayrılmış xüsusi zolaqda qət edirlər. Bu il 21 kilometrdən çox olan qaçış zolağına 26 brendə məxsus 300-dən çox humanoid robot çıxıb. Onların təxminən 40 faizi süni intellektin idarəetməsi ilə tam avtonom şəkildə qaçır, digərləri isə məsafədən idarə olunur.
Qaydalara əsasən, ən qısa robotun boyu 75 santimetrdən az, ən hündürünün boyu isə 1,8 metrdən çox olmamalıdır. Maşınlara bütün məsafəni qət etmək üçün 3 saat 40 dəqiqə vaxt verilib. Tədbir qaçışçılar arasında böyük marağa səbəb olub; belə ki, təşkilatçılar iştirak üçün 32,4 mindən çox müraciət qəbul ediblər. Çin Yüngül Atletika Assosiasiyası marafona süni intellektin iştirak etdiyi rəsmi yarış statusu verib.
