ABŞ Silahlı Qüvvələri İranla əlaqəli gəmiləri Yaxın Şərq regionundan çox-çox uzaqlarda təqib edəcək.
Ölkə.Az-ın CNN-ə istinadən məlumatına görə, bu barədə cümə axşamı ABŞ Qərargah Rəisləri Komitəsinin sədri, general Den Keyn bəyanat verib. O, xüsusilə Hind-Sakit okean regionunu qeyd edib.
"Lloydslist.com"un məlumatına görə, Sakit okean regionunda, xüsusən də Malakka boğazı və ətrafındakı sularda İrandan qeyri-qanuni və ya sanksiya altındakı nefti daşıyan "kölgə donanması"na aid çox sayda tanker cəmləşib.
"Biz blokadaya başlamazdan əvvəl ərazini tərk etmiş gəmilərə qarşı Sakit okeandakı məsuliyyət zonamızda (AOR) bənzər dəniz kəşfiyyatı və ələ keçirmə əməliyyatları həyata keçiririk", — deyə Keyn bildirib.
"Nüvə İranına Qarşı Birləşmiş Şəxs" (UANI) qeyri-kommersiya təşkilatının "kölgə donanmalarının" izlənilməsi üzrə baş məsləhətçisi və ABŞ Hərbi Dəniz Qüvvələrinin keçmiş zabiti Çarli Braun CNN-ə bildirib ki, Keynin açıqlamaları və ABŞ hərbi gəmilərinin peyk görüntüləri ilə qeydə alınan hərəkətləri Vaşinqtonun daha əvvəl Venesuela tankerlərinə qarşı tətbiq etdiyi əməliyyatlara bənzər addımlar atacağını göstərir.
"Əvvəllər ABŞ sanksiya tətbiq edilmiş tankerləri Venesueladan xeyli uzaqda, o cümlədən Hind okeanında saxlayıb. Mən bənzər aktivliyi məhz burada — ABŞ-ın daha çox hərəkət azadlığına malik olduğu və daha az məhdudiyyətlərlə üzləşdiyi beynəlxalq sularda gözləyirəm", — deyə Braun əlavə edib.
CNN telekanalı ABŞ-ın "USS Miguel Keith" gəmisinin hərəkəti ilə bağlı 7-ci Donanmanın komandanlığına sorğu ünvanlayıb. Peyk görüntülərinə görə, gəmi cümə axşamı günü Malakka boğazı istiqamətində hərəkət edib. Qeyd edək ki, aprelin 8-də Yaponiyanın Sasebo limanından çıxan "USS Miguel Keith" "Nimitz" sinfinə aid təyyarədaşıyanlarla eyni ölçüdə olan nəhəng bir gəmidir. Cümə günü qısa müddətə Sinqapur sularına daxil olan gəmi axşam saatlarında Malakka boğazı ilə yoluna davam edib. Dəniz Piyadaları Korpusunun məlumatına görə, bu gəmi "ekspedisiya dəniz bazası" kimi tanınır və tapşırıqlarına minatəmizləmə və xüsusi əməliyyatların keçirilməsi daxildir.
General Keyn bəyanatında həmçinin Hörmüz boğazındakı sıxlığa toxunaraq, ABŞ qoşunlarını belə çətin şəraitdə blokada əməliyyatını uğurla həyata keçirdiklərinə görə tərifləyib.
