ABŞ Mərkəzi Komandanlığı (CENTCOM), aprelin 13-də İran limanlarına qarşı tətbiq edilən hərbi blokadanın ilk rəsmi nəticələrini açıqlayıb.
Musavat.com xəbər verir ki, Pentaqonun yaydığı məlumata görə, blokada qüvvəyə mindiyi gündən bəri İranın Fars və Oman körfəzlərindəki limanlarına daxil olmaq və ya oradan çıxmaq istəyən 21 ticarət gəmisi Amerika hərbçilərinin tələbi ilə geri dönmək məcburiyyətində qalıb.
CENTCOM-un "X" sosial şəbəkəsindəki paylaşımına görə, "USS Michael Murphy" esminseti və digər bir qrup hərbi gəmi Ərəb dənizində patrulu davam etdirir. Bildirilir ki, 21 gəminin hamısı Amerika hərbçilərinin "yolunuzu dəyişin" əmrinə tabe olaraq münaqişəsiz şəkildə İran sahillərinə qayıdıb.
Tehran tərəfi Hörmüz boğazını tamamilə açıq elan etsə də, ABŞ-ın bu addımını sülh sazişinin pozulması kimi qiymətləndirir. İran tərəfi bildirir ki, dəniz hərəkəti yalnız onların müəyyən etdiyi marşrutlarla aparılmalıdır.
Prezident Donald Tramp bəyan edib ki, İranla sövdələşmə 100% tamamlanana qədər blokada tam gücü ilə qüvvədə qalacaq. O, Hörmüz boğazının açılmasını alqışlasa da, İran limanlarına iqtisadi təzyiqin dayandırılmayacağını vurğulayıb.
Ekspertlər hesab edirlər ki, 21 gəminin bloklanması Pakistanın vasitəçiliyi ilə aparılan sülh danışıqlarında Vaşinqtonun əlini gücləndirmək məqsədi daşıyır. İranın xarici ticarətinin faktiki olaraq iflic edilməsi Tehranı daha böyük güzəştlərə məcbur edə bilər.
Hazırda dənizdəki bu "soyuq müharibə" neft qiymətlərindəki qeyri-sabitliyi qoruyub saxlayır. Gəmilərin geri qaytarılması hələlik hərbi toqquşma ilə nəticələnməsə də, CENTCOM-un "güc nümayişi" hər an tərəflər arasında birbaşa atışma riskini gündəmdə saxlayır.
Musavat.com
