"Lufthansa"da pilotların tətili bu gün də davam edərkən, şirkətin xərclərin artmasını əsas gətirərək törəmə müəssisəsi "CityLine"ın fəaliyyətini dayandırmaq qərarı böhranı daha da dərinləşdirib.
AFN.az xəbər verir ki, Frankfurt hava limanının operatoru "Fraport"un verdiyi açıqlamaya görə, tətil səbəbindən bu gün üçün planlaşdırılan 1337 uçuşdan təxminən 650-si ləğv edilib.
Ləğv olunan uçuşların böyük əksəriyyəti "Lufthansa", "Lufthansa Cargo" və fəaliyyəti dayandırılan "Lufthansa CityLine"ın payına düşüb. 100 illik yubileyini qeyd edən "Lufthansa"da bu həftə ərzində pilotlar dörd, kabin heyəti isə iki gün işi dayandıraraq tətili ardıcıl beşinci günə daşıyıblar.
Bu arada, "Lufthansa Group" rəhbərliyi Yaxın Şərqdəki münaqişələr səbəbindən artan yanacaq xərclərini və əmək mübahisələrini əsas gətirərək, "CityLine"ın fəaliyyətinə şənbə günündən etibarən birdəfəlik son qoymaq qərarı verdiyini elan edib. Əvvəlcə ilin sonunda bağlanması planlaşdırılan aviaşirkətin fəaliyyəti bu qərarla nəzərdə tutulandan daha erkən dayandırılacaq.
Şirkət bu addımlarla səmərəliliyi artırmağı və illik bazda təxminən 1,4 milyard avroya çatması gözlənilən əlavə yanacaq xərclərini kompensasiya etməyi hədəflədiyini açıqlayıb. Digər tərəfdən, "Lufthansa" ilə pilotların həmkarlar ittifaqı "Vereinigung Cockpit" (VC) arasındakı kollektiv müqavilə danışıqlarında hələ də razılıq əldə olunmayıb.
Həmkarlar ittifaqı rəhbərliyin sərt qənaət tədbirlərini tənqid edərək irəli sürülən geosiyasi səbəblərin inandırıcı olmadığını və rəqib şirkətlərin heç birinin bu səviyyədə ixtisarlara getmədiyini bildirib.
