Dünyanın ən böyük dəniz faciələrindən biri olan "Titanik" qəzasından sağ çıxan bir sərnişinə aid xilasetmə jileti bu həftəsonu Birləşmiş Krallıqda təşkil olunacaq xüsusi hərracda satışa təqdim ediləcək.
AFN.az xəbər verir ki, "Henry Aldridge and Son" hərrac evi tərəfindən həyata keçiriləcək hərracda gödəkcənin 250 min ilə 350 min funt-sterlinq arasında bir qiymətə alıcı tapacağı gözlənilir.
1912-ci ildə baş vermiş faciədən sağ çıxan bir şəxsə aid xilasetmə jiletinin ilk dəfə hərraca çıxarılacağı bildirilir və mütəxəssislər bu satışı kolleksiyaçılar üçün nəsildə bir dəfə ələ düşə biləcək fürsət kimi qiymətləndirirlər. Sözügedən gödəkcə gəminin birinci sinif sərnişinlərindən olan Laura Mabel Frankatelliyə məxsus olub.
Moda dizayneri Lüsi Daff Qordonun katibəsi olan Frankatelli işəgötürəni və onun həyat yoldaşı ilə birlikdə bir nömrəli xilasedici qayığa minərək sağ qalmağı bacarmışdı. Üzərində həm Frankatellinin, həm də eyni qayıqda xilas olan digər sərnişinlərin imzaları olan bej rəngli gödəkcə 12 cibdən ibarətdir.
Bu tarixi eksponat daha əvvəl gəminin inşa edildiyi yerdəki "Titanic Belfast" muzeyi ilə Tennessidəki "Titanik" muzeyində nümayiş etdirilib. Hərrac evinin baş direktoru Endryu Oldric gödəkcənin gəmidən günümüzə qədər gəlib çatan ən ikonik parçalardan biri olduğunu vurgulayıb.
Oldric qeyd edib ki, "Titanik"in 114 il əvvəl batmasına baxmayaraq, gəmidəki hər sərnişinin ayrı bir hekayəsi var və bu növ xatirələr həmin faciəni bu gün də canlı tutur. Xatırladaq ki, qəza gecəsi təxminən 2220 nəfəri daşıyan "Titanik" aysberqlə toqquşduqdan sonra üç saatdan az bir müddətdə batmışdı. Gəmidə kifayət qədər xilasedici qayığın olmaması səbəbindən təxminən 1500 nəfər həyatını itirmiş, yalnız 700-ə yaxın sərnişin xilas ola bilmişdi.
