“Universitet bitirən gənc xüsusilə regionlarda iş qurmaqda çətinlik çəkməməlidir. Bununla bağlı çox ciddi problemlər var. Xüsusilə, bank faizlərinin həddindən artıq böyük olması 10 il iş sahəsində çalışan biznesmenlə yeni işə başlayan biznesmen arasında bir fərq qoyulmursa, faiz dərəcəsi eynidirsə, istər-istəməz gənc savadlı olsa da, ilkin vəsaiti tapa, iş qura bilmir. Bankların elə ağır girov şərtləri var ki, həyata yeni addım atan bir gəncin girovu haradan tapacağı sual altındadır. Tək sahib olduğu valideynlərin evini belə girov qoymağa risk edə bilmir. Bu problemləri həll etməsək, bir müddət sonra çox ciddi problemlərlə qarşılaşacağıq. Banklar yalnız bugünkü gəlirlərini düşünsələr, bunun gələcəyi yoxdur. Banklar onsuz da gəlirlərini artırırlar. Hesabatlarda da bunu görürük, amma biz gələcəyin kadrlarına, düşünən beyinlərə yatırım etməliyik”.
Pravda.az xəbər verir ki, bu sözləri Milli Məclisin deputatı Naqif Həmzəyev "Xəbərimiz var" verilişində deyib.
Deputat bildirib ki, xaricdəki mərkəzlər düşünən beyinləri asanlıqla Azərbaycandan “oğurlayırlar”: “Gənclərə faizsiz kreditlər verməliyik ki, yaxşı startap biznesi ortaya qoysunlar. Cibində nə qədər pul olursa, olsun, pulu xərcləməyə yer olmalıdır. Yalnız restoranlarla iş bitmir. Bir yemək yedin, iki gün yedin, üçüncü gün hamıya qonaqlıq verdin. Adam özü də bezir... Teatrların, konsert zallarının, mədəniyyət ocaqlarının aktiv şəkildə işləməsi lazımdır. Məsələn, Gəncədəki Flarmoniya Bakıdakından qat-qat böyükdür, çox imkanları var, amma görün hansında daha çox məşhurluq var, tədbir keçirilir. Gəncədə belə problem varsa, digər rayonlarda daha çoxdur”.
Aytəkin Qardaşova
