Türkiyə Prezidenti Rəcəb Tayyib Ərdoğan rəhbərlik etdiyi Ədalət və İnkişaf Partiyasının (AKP) parlament qrupunun iclasında çıxış edərək daxili siyasət, energetika və beynəlxalq vəziyyətlə bağlı mühüm bəyanatlar verib.
Ölkə.Az TRT Haber-ə istinadən xəbər verir ki, Ərdoğan çıxışına Şəhidləri Anma Həftəsi münasibətilə müraciət edərək başlayıb, həlak olan hərbçilərin xatirəsini ehtiramla yad edib və qazilərə minnətdarlığını bildirib. O, dövlətin "hər zaman onların ailələrinin yanında" olacağını bəyan edib.
Prezident Şanlıurfa əyalətindəki liseylərin birində baş vermiş və 16 nəfərin yaralanması ilə nəticələnmiş hadisəni ayrıca şərh edib. Onun sözlərinə görə, təhqiqat başladılıb, bir nəfər saxlanılıb, təhsil sahəsinin bir neçə rəhbər şəxsi isə vəzifəsindən kənarlaşdırılıb. O, "günahkarların mütləq cavab verəcəyinə" söz verib.
Çıxışının böyük bir hissəsini energetika siyasətinə həsr edən Ərdoğan bildirib ki, Türkiyə tədarük mənbələrini şaxələndirərək və öz hasilatını inkişaf etdirərək ardıcıl şəkildə enerji müstəqilliyinə doğru irəliləyir. Prezident Qara dənizdə qaz hasilatının artdığını qeyd edərək, bunun artıq milyonlarla ev təsərrüfatını enerji ilə təmin etdiyini və yaxın illərdə daha da genişlənəcəyini vurğulayıb. O, həmçinin bərpa olunan enerji və atom layihələrinin inkişafını qeyd edib.
Ərdoğan Türkiyə hüdudlarından kənarda, o cümlədən Somalidə dəniz qazma işlərinin davam etdiyini bildirib və bunu "qarşılıqlı faydalı əməkdaşlıq" nümunəsi adlandırıb. O qeyd edib ki, Türkiyənin "Çağrı bəy" qazma gəmisi ilkin seysmik tədqiqatlardan sonra Somali sahillərində işlərə başlayıb.
Çıxışının sonunda prezident Türkiyənin son 23 ildə mövqelərini əhəmiyyətli dərəcədə gücləndirdiyini vurğulayıb:
"Sosial şəbəkələrdə məni və ölkəmi təhqir edənlərə, o uşaq qatillərinə bəzi faktları xatırlatmaq istəyirəm: Türkiyə Cümhuriyyəti sıradan bir dövlət deyil. Heç bir güc Türkiyəyə və ya Türkiyə Cümhuriyyətinin prezidentinə barmaq silkələyə bilməz. Heç kim bizim yumşaqlığımızı və sağlam düşüncəmizi qoyun mütiliyi kimi qəbul etməsin; kimsə belə xülyalara qapılmasın. Biz ehtiyac yaranarsa, yerin üzündə şərəfsiz yaşamqdansa, yerin altında izzətlə uyumağı ən böyük şərəf sayırıq", — deyə o bildirib.
