İran Prezidenti Məsud Pezeşkyan ölkəsinin dialoqa hazır olduğunu, lakin təzyiq və məcburetmə cəhdlərini qəbul etməyəcəyini bəyan edib.
7News.Az xarici mətbuata istinadən xəbər verir ki, Pezeşkian bu açıqlamanı Tehranda təcili tibbi yardım xidmətləri mərkəzinə səfəri zamanı verib. O, beynəlxalq münasibətlərdə "ikili standartlar”ın tətbiqini tənqid edərək, hər hansı ölkəyə qarşı hərbi hücumların ümumi qəbul edilmiş prinsiplərə zidd olduğunu vurğulayıb.
Prezident bildirib ki, ABŞ və İsrailin İrana qarşı hərbi fəaliyyəti beynəlxalq hüquqa uyğun deyil. O, hücumlar zamanı mülki şəxslərin və obyektlərin hədəf alındığını qeyd edərək belə sual ünvanlayıb: "Beynəlxalq hüquq və humanitar prinsiplər çərçivəsində mülki şəxsləri, uşaqları və məktəb, xəstəxana kimi həyati əhəmiyyətli obyektləri hədəfə almaq necə əsaslandırıla bilər?”
Pezeşkian əlavə edib ki, İran bütün təzyiqlərə baxmayaraq prinsipial mövqeyindən geri çəkilməyəcək. Onun sözlərinə görə, ölkə müharibə və qeyri-sabitlik tərəfdarı deyil və daim dialoq və konstruktiv əməkdaşlığa üstünlük verib.
"Ölkəni təslim olmağa məcbur etmək cəhdləri uğursuzluğa məhkumdur. İran xalqı belə yanaşmanı heç vaxt qəbul etməyəcək”, – deyə prezident vurğulayıb.
