Son illərdə texnologiyanın həyatımıza sürətlə daxil olması ilə birlikdə ekranların yuxuya mənfi təsiri barədə narahatlıqlar artıb. Xüsusilə telefon, planşet və televizorların yaydığı mavi işığın yuxu rejimini pozduğu tez-tez vurğulanır.
Müəllif bu iddiaların nə dərəcədə doğru olduğunu yoxlamaq üçün qeyri-adi bir təcrübəyə başlayıb. O, hər axşam yatmazdan üç saat əvvəl xüsusi narıncı qoruyucu eynəklər taxıb, evindəki bütün işıq mənbələrini söndürərək yalnız şam işığından istifadə edib və pəncərələri qaranlıq pərdələrlə örtüb.
QHT.az xarici mediaya istinadən bildirir ki, son elmi araşdırmalar mavi işığın yuxuya təsiri ilə bağlı fikirlərin düşündüyümüz qədər sadə olmadığını göstərir. Ekspertlərin sözlərinə görə, telefon ekranından gələn işığın yuxunu ciddi şəkildə pozması ehtimalı o qədər də yüksək deyil.
Araşdırmaların nəticələri ziddiyyətlidir. Telefonlarda mavi işığı azaltmaq üçün nəzərdə tutulan funksiyaların yuxunu əhəmiyyətli dərəcədə yaxşılaşdırmadığı qeyd olunur. Bununla belə, müasir həyat tərzində ümumi işıqlandırma şəraiti insanın bioloji saatına təsir edərək yuxu keyfiyyətinə ciddi təsir göstərə bilər.
Mütəxəssislər hesab edir ki, əsas problem təkcə ekranlar deyil, ümumilikdə gün ərzində və gecə saatlarında məruz qaldığımız işıq mühitidir. Bu isə yuxu rejiminin qorunması üçün daha geniş yanaşmanın vacibliyini göstərir.
