Səudiyyə Ərəbistanının İranın digər ticarət marşrutlarını hədəf alacağından narahat olduğu üçün ABŞ-ın İran limanlarına tətbiq etdiyi blokadanı ləğv etməsi məqsədilə Vaşinqton administrasiyasına təzyiq göstərdiyi iddia edilib.
AFN.az xəbər verir ki, "The Wall Street Journal" (WSJ) qəzetinin məlumatına görə, adları açıqlanmayan səudiyyəli rəsmilər Riyad rəhbərliyinin ABŞ-ın İranla yenidən danışıqlar masasına qayıtmasını istədiyini bildiriblər.
Rəsmilər qeyd ediblər ki, Səudiyyə Ərəbistanı bu dəniz blokadasından sonra Tehranın Babül-Məndəb boğazı kimi digər beynəlxalq ticarət yollarını hədəfə alacağından qorxur və bu səbəbdən Vaşinqtonu blokadanı dayandırmağa çağırır. Krallığın enerji sektoru rəsmiləri isə Yəməndəki İranın dəstəklədiyi husilərdən gəmilərə hücum etməmək barədə öhdəlik aldıqlarını iddia etsələr də, vəziyyətin qeyri-müəyyən olduğunu və husilərin daha aqressiv reaksiya verə biləcəyini Vaşinqtonun diqqətinə çatdırıblar.
Digər tərəfdən, Ağ Ev sözçüsünün müavini Anna Kelli Donald Tramp administrasiyasının Körfəzdəki müttəfiqləri ilə sıx təmasda olduğunu və İranın ABŞ-a, eləcə də digər ölkələrə təzyiq göstərməsinin qarşısını almağa çalışdıqlarını müdafiə edib.
