Pentaqonun rəhbəri Pit Heqset və İndoneziyanın müdafiə naziri Şafri Şəmsuddin Vaşinqtonda danışıqlar aparıblar. Tərəflər ikitərəfli müdafiə əməkdaşlığı sahəsində tərəfdaşlıq haqqında saziş imzalayıblar.
Görüşün yekunlarına dair yayımlanan kommünikedə bildirilir ki, ABŞ və İndoneziya Hind-Sakit okean regionunda sülh və sabitliyin qorunmasına sadiqliyini təsdiqləyib. Saziş qabaqcıl təşəbbüslərin öyrənilməsi üçün yeni strukturun yaradılmasını nəzərdə tutur, “o cümlədən mürəkkəb asimmetrik imkanların birgə hazırlanması və dəniz, sualtı və avtonom sistemlər sahəsində növbəti nəsil müdafiə texnologiyalarının tətbiqi”. Sənədə, xüsusilə, xüsusi təyinatlı bölmələrin birgə hazırlığının gücləndirilməsi barədə bənd də daxildir.
İndoneziyanın Müdafiə Nazirliyinin açıqlamasına görə, Pentaqon ABŞ hərbi təyyarələri üçün İndoneziya hava məkanına “tam gecə çıxışı”nın verilməsinə çalışır. Hazırda bu məsələ üzrə niyyətlər haqqında bəyannamə müzakirə olunur. Nazirlik vurğulayıb ki, İndoneziyanın hava məkanı üzərində nəzarət yalnız İndoneziya hakimiyyətinə məxsusdur, “Reuters” xəbər verir. Bununla yanaşı, agentlik qeyd edir ki, İndoneziya prezidenti Prabovo Subianto bu təklifi təsdiqləyib.
