Rusiya Xarici İşlər Nazirliyinin rəsmi nümayəndəsi Mariya Zaxarova Fransa prezidenti Emmanuel Makronun həyat yoldaşı tərəfindən vurulması ilə bağlı yayılan görüntülərə istehzalı münasibət bildirib.
Ölkə.Az xəbər verir ki, o, “Vesti” informasiya xidmətinə Andrey Malakhov ilə müsahibəsində ötən il təyyarədən enərkən baş verən “sağdan gələn zərbə” hadisəsini xatırladıb.
“Sağdan zərbə. Bu dramın sonunu görmədik”, — deyə Zaxarova gülərək bildirib.
Bu hadisə ilə bağlı suala cavab olaraq o, Malaxovdan zarafatla soruşub ki, Makron ailəsində qalan hər şeyin normal olduğunu düşünüb-düşünmür. Zaxarova qeyd edib ki, ailə məsələləri qapalı qalmalıdır. Diplomat Makron və həyat yoldaşı arasında baş verənləri karikatura üçün mövzu adlandırıb.
“Mən həmişə hesab edirəm ki, ailə məsələləri şəxsi qalmalıdır... Bu cür karikaturaya bənzər şeylər isə Charlie Hebdo üçündür”, — deyə o əlavə edib.
Xatırladaq ki, ötən ilin may ayında sosial şəbəkələrdə Emmanuel Makronun həyat yoldaşı Brijit tərəfindən üz nahiyəsinə zərbə aldığı görüntülər yayılmışdı. Hadisə Vyetnamın Hanoy şəhərində prezident təyyarəsinin bortunda baş verib. Video görüntülərin həqiqiliyi Yelisey sarayı tərəfindən təsdiqlənmişdi.
Bu kadrlar geniş ictimai rezonans doğurmuşdu. Həmin vaxt Zaxarova bu hadisəni şərh edərkən bunun “Kremlin əli” ola biləcəyini də zarafatla qeyd etmişdi.
