Nəsimi Rayon Məhkəməsində dələduzluqda təqsirləndirilən Vahid Əkbərlinin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Solmaz Mustafayevanın sədrliyi ilə keçirilən prosesdə hökm oxunub.
Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarının 5.1-ci bəndi tətbiq edilməklə təqsirləndirilən şəxs Cinayət Məcəlləsinin 178.2.4-cü maddəsi ilə cinayət məsuliyyətindən azad olunub və cinayət işi üzrə icraata xitam verilib. Vahid Əkbərli barəsində seçilmiş başqa yerə getməmək haqqında iltizam qətimkan tədbiri ləğv edilib.
İttiham aktına əsasən, Vahid Əkbərli etibardan sui-istifadə etmə və aldatma yolu ilə özgənin xeyli miqdarda əmlakını ələ keçirərək dələduzluq etməkdə təqsirləndirilir.
İstintaq materiallarında göstərilir ki, təqsirləndirilən şəxs tanışı olan zərərçəkmiş Kərəm Kərimovun (adı, soyadı şərtidir) etibarını qazanmaq məqsədilə özünü geniş əlaqələrə malik şəxs kimi təqdim edib. O, həmin əlaqələrdən istifadə etməklə zərərçəkmiş şəxsi dövlət orqanlarının birində işlə təmin edə biləcəyini bildirib və bunun müqabilində 6000 manat pul tələb edib. Bu yalan vədlərlə zərərçəkmiş şəxsi aldadan Vahid 14 noyabr 2023-cü il tarixdə paytaxtın Nəsimi rayonu ərazisində yerləşən “Delfin” kafesinin yaxınlığında zərərçəkmiş şəxsdən 3000 manat, 18 noyabr 2023-cü il tarixdə isə həmin ərazidə daha 3000 manat pul alıb. Lakin sonradan üzərinə götürdüyü öhdəliyi yerinə yetirməyərək vəd etdiyi işi təşkil etməyib və əldə etdiyi 6000 manat məbləğində vəsaiti mənimsəyib.
Beləliklə, təqsirləndirilən şəxsin bu hərəkətləri nəticəsində Kərəm Kərimova xeyli miqdarda maddi ziyan vurulub və əməl Cinayət Məcəlləsinin müvafiq maddəsi ilə dələduzluq kimi tövsif edilib.
Məhkəmə istintaqı zamanı ifadə verən Vahid Əkbərli ona qarşı irəli sürülmüş ittiham üzrə özünü təqsirli bildiyini deyib.
Zərərçəkmiş Kərəm Kərimov isə ifadəsində söyləyib ki, o, uzun illər dövlət orqanlarında xidmət edib. Belə ki, 2005–2025-ci illər ərzində müxtəlif vəzifələrdə çalışıb, 2025-ci ilin may ayında isə Daxili İşlər Nazirliyinin Baş Pasport, Qeydiyyat və Miqrasiya İdarəsindən baş inspektor vəzifəsindən, polis mayoru xüsusi rütbəsi ilə təqaüdə çıxıb. Hazırda heç bir yerdə işləmədiyini və fərdi əməklə məşğul olduğunu qeyd edən zərərçəkmiş şəxs Vahidin vədlərinə inanaraq ona pul verdiyini vurğulayıb.
