University of Eastern Finland tərəfindən aparılan yeni araşdırma göstərir ki, sauna qəbul etmək qısa müddət ərzində qanda ağ qan hüceyrələrinin səviyyəsini artıra bilər. Ağ qan hüceyrələri orqanizmi infeksiya və xəstəliklərdən qorumaqda mühüm rol oynayır.
Tədqiqatda iştirak edən şəxslər 30 dəqiqə sauna qəbul etdikdən (ara hissədə qısa soyuq duş daxil olmaqla) sonra qanda dövr edən bütün növ ağ qan hüceyrələrinin artdığı müşahidə olunub. Əsas immun hüceyrələri olan neytrofillər və limfositlər isə təxminən 30 dəqiqə sonra yenidən əvvəlki səviyyəsinə qayıdıb.
Alimlər hesab edir ki, sauna seansı zamanı əlavə ağ qan hüceyrələri toxumalardan qana keçərək orqanizmdə daha aktiv “nəzarət” həyata keçirir və sonra yenidən əvvəlki yerlərinə qayıdır. Oxşar proses fiziki məşq zamanı da baş verir və ümumi immun müdafiəni gücləndirir.
Araşdırmada həmçinin immun reaksiyaları tənzimləyən sitokinlərin səviyyəsi də ölçülüb. Ümumilikdə sitokin səviyyələrində ciddi dəyişiklik müşahidə olunmasa da, bəzi fərqlər iştirakçıların bədən temperaturunun nə qədər yüksəlməsi ilə əlaqəli olub. Ağ qan hüceyrələrinin sayı ilə bədən temperaturu arasında isə belə bir əlaqə aşkarlanmayıb.
Qeyd edək ki, sauna istifadəsi müxtəlif sağlamlıq faydaları ilə əlaqələndirilsə də, bu tədqiqat yalnız bir dəfəlik sauna seansının qısamüddətli təsirlərini araşdırıb. Uzunmüddətli təsirlərlə bağlı əlavə araşdırmalara ehtiyac var.
Tədqiqat orta yaşı 50 olan 51 yetkin şəxsin iştirakı ilə aparılıb və nəticələr Temperature jurnalında dərc olunub.
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
