İranın Ali Rəhbəri Əli Xameneinin qətlindən 40 gün keçməsi münasibətilə xalqa müraciət edən Müctəba Xamenei beynəlxalq aləmdə böyük əks-səda doğuran və gərginliyi pik həddə çatdıran bəyanatlar səsləndirib. Bu müraciət rəsmi Tehranın həm daxili, həm də xarici siyasətdə daha radikal və kompromissiz bir xəttə keçdiyinin rəsmi elanı kimi qiymətləndirilir.
NOCOMMENT.az xəbər verir ki, Müctəba Xamenei öz çıxışında İran xalqını bu mübarizə meydanının qətiyyətli qalibi adlandıraraq, ölkəsinin artıq böyük bir dövlətə çevrilmək ərəfəsində olduğunu vurğulayıb. O, İranın suverenliyinə qəsd edən “cinayətkar təcavüzkarların” cəzasız qalmayacağını bəyan edərək, dəymiş hər bir maddi zərər üçün təzminat tələb ediləcəyini və şəhidlərin qan bahasının mütləq alınacağını qətiyyətlə qeyd edib.
Çıxışın ən kritik hissəsini isə strateji əhəmiyyətli Hörmüz boğazı və region ölkələri ilə bağlı mesajlar təşkil edib. Müctəba Xamenei İranın Hörmüz boğazının idarəedilməsində yeni və daha sərt bir mərhələyə keçdiyini elan edərək, cənub qonşularını “şeytanların yalan vədlərindən” çəkinməyə və baş verən “möcüzəni” düzgün qiymətləndirib doğru tərəfdə yer almağa çağırıb. İranın müharibə axtarışında olmadığını, lakin öz qanuni haqlarından bir addım belə geri çəkilməyəcəyini deyən Xamenei, bütün “Müqavimət Cəbhəsi”ni vahid bir güc kimi gördüklərini xatırladıb. Sonda Tehranın mərhum Ali Rəhbərin və bütün şəhidlərin qisasını almaq əzmində olduğu və bu yoldan dönməyəcəyi bir daha bütün dünyaya bəyan edilib.
Sara
NOCOMMENT.az
