"Aqrar Sığorta Müştərək Sığorta Şirkəti" 2025-ci ilin maliyyə nəticələrini açıqlayıb. Şirkət hesabat ilini 100 min manat xalis mənfəətlə başa vurub. Bu göstərici əvvəlki illə müqayisədə 38,9 % çoxdur.
Maliyyə hesabatına əsasən, ötən il şirkətin gəlirləri 22 milyon 298 min manat təşkil edib ki, bu da illik müqayisədə 75,2 % artım deməkdir. Xərclər 22 milyon 170 min manat olub və 75,6 % artıb. Şirkətin mənfəət vergisi üzrə ödənişləri isə 28 min manat təşkil edib ki, bu da əvvəlki illə müqayisədə 6,7 % azdır.
2026-cı ilin 1 yanvar tarixinə olan məlumata görə, "Aqrar Sığorta Müştərək Sığorta Şirkəti"nin aktivləri 10 milyon 51 min manat olub. Bu isə illik müqayisədə 31,2 % azalma deməkdir. Hesabat dövründə öhdəliklər 7 milyon 762 min manata düşərək 36,7 % azalıb, balans kapitalı isə 2 milyon 288 min manata enərək 2,3 % azalma göstərib.
Qeyd edək ki, "Aqrar Sığorta Müştərək Sığorta Şirkəti" 2024-cü ilin avqust ayında yaradılıb. Şirkətin nizamnamə kapitalı 2 milyon 187 min 500 manatdır. Səhmdarları hər biri 16,67 % paya malik olan 6 yerli sığorta şirkəti — "PAŞA Sığorta", "Qala Sığort"a, "Meqa Sığorta", "Azərbaycan Sənaye Sığorta", "Xalq Sığorta" və "Azsığorta" ASC-ləridir.
Şirkət Aqrar Sığorta Fondunun idarəedici təşkilatı kimi fəaliyyət göstərir. Maliyyə qurumu sığortalılarla müqavilələrin bağlanmasını, sığorta hadisələri üzrə müraciətlərin qəbulunu və aqrar sığorta sisteminin ümumi idarə edilməsini həyata keçirir. Təsisçi sığorta şirkətləri isə sistemdə vasitəçi rolunu oynayır.
