İsrail uzunmüddətli müharibəyə hazırlaşır.
“Yeni Sabah” “Reuters”ə istinadən xəbər verir ki, İsrail Fələstinin HƏMAS təşkilatının 2023-cü il oktyabrın 7-də həyata keçirdiyi hücumlardan sonra hərbi strategiyasında ciddi dəyişikliklər edib.
Yeni yanaşmaya əsasən, düşmənləri tam məhv etmək yox, onları zəiflətmək, qorxutmaq və parçalamaq hədəflənir. Bu isə regionda uzunmüddətli və qeyri-müəyyən müharibə vəziyyətinin formalaşmasına səbəb olur. Hazırda İsrail Qəzza, Suriya və Livan ərazilərində “bufer zonalar” yaradır. Livanın cənubunda Litani çayına qədər ərazilər nəzarətə götürülüb, bəzi kəndlərdə dağıntılar aparılır və sakinlərin köçürülməsi tələb olunur. İsrail tərəfi bu addımları təhlükəsizliyin təmin olunması ilə əsaslandırır. Hərbi rəsmilərə görə, məqsəd sərhəddən 5-10 km dərinlikdə təhlükəsizlik zonası yaradaraq raket və digər hücumların qarşısını almaqdır.
İsrailin Baş naziri Benyamin Netanyahu bildirib ki, artıq Qəzza zolağının yarıdan çoxunda və digər istiqamətlərdə geniş nəzarət zonaları formalaşdırılıb. Müdafiə naziri İsrail Katz isə sərhədə yaxın evlərin hərbi obyekt kimi qiymətləndirildiyini və məhv edilməsinin zəruri olduğunu vurğulayıb.
Bununla yanaşı, bəzi siyasətçilər, o cümlədən Bezalel Smotriç bu zonaların daimi ərazi genişləndirilməsi kimi istifadə olunmasını təklif edir. Lakin hərbi dairələr əsas məqsədin işğal yox, təhlükənin uzaqlaşdırılması olduğunu bildirir. Ümumilikdə, bu strategiya regionda gərginliyi artırır və davamlı sülh perspektivini zəiflədir. ABŞ və İran arasında müvəqqəti atəşkəs əldə olunsa da, hələlik tam sabitlik və sülh təmin olunmayıb.
Qeyd edək ki, aprelin 8-də ABŞ və İran arasında müvəqqəti atəşkəs razılaşması əldə edilib. Danışıqlar üçün vasitəçilik təşəbbüsləri davam edir, lakin tam sülh hələlik təmin olunmayıb.
Aytəkin Əliyeva
Telegram kanalımız
