Qarşılıqlı hörmət,
ortaq maraqlara əsaslanan əməkdaşlıq regionda yeni siyasi mədəniyyət
formalaşdırır ki, bu baxımdan Azərbaycan Gürcüstan əlaqələri mühüm faktordur.
İki ölkə arasında münasibətlər yalnız coğrafi qonşuluqla məhdudlaşmır, eyni
zamanda bu münasibətlər dərin tarixi köklərə və qarşılıqlı etimada əsaslanan
strateji tərəfdaşlıq modelidir.
Aprelin 6-da Gürcüstana
səfəri çərçivəsində Prezident İlham Əliyev siyasi-iqtisadi münasibətlərin yeni
mərhələyə qədəm qoyduğunu göstərir.
Xüsusən son illərdə iki ölkə arasında ticarət dövriyyəsinin artım
dinamikası xüsusi diqqət çəkir. 800 milyon dollardan artıq olan ticarət həcmi
və cari ildə bu göstəricinin daha da yüksəlməsi iqtisadi əlaqələrin sabit və
davamlı xarakter daşıdığını göstərir. Cənab Prezidentin mətbuaya bəyanatla
etdiyi çıxışında qeyd olunduğu kimi, mövcud temp qorunarsa, yaxın perspektivdə
ticarət dövriyyəsinin bir milyard dollara çatması tam real görünür. Bu isə
artıq münasibətlərin yeni iqtisadi miqyas qazandığını deməyə əsas verir.
Səfər çərçivəsində
mətbuata birgə bəyanat zamanı Prezident İlham Əliyev deyib: “Müzakirə etdiyimiz
məsələlər bir daha onu göstərir ki, Gürcüstan və Azərbaycan hər zaman olduğu
kimi bir yerdədir. Bizim tarixi əlaqələrimiz dövlətlərarası əlaqələrimiz üçün
möhkəm zəmindir. Əsrlər boyu gürcü və Azərbaycan xalqları dostluq, qardaşlıq
şəraitində yaşamışlar və bu gün bu ənənələr davam etdirilir. Bu gün iki
müstəqil dövlət kimi Gürcüstan və Azərbaycan inamla inkişaf edir”.
Dövlət başçısı Azərbaycanın
enerji siyasətində Gürcüstanın rolundan da danışıb: “Azərbaycan energetika
sahəsində uzun illər bir çox ölkələrin enerji təhlükəsizliyini gücləndirən
addımlar atmışdır. Bu gün Azərbaycan qazı 16 ölkəyə ixrac edilir. Ancaq bu ixrac
yenə də Gürcüstandan başlayır və Gürcüstan burada birinci ölkədir. Həm
Azərbaycan nefti, qazı Gürcüstan vasitəsilə dünya bazarlarına çıxarılır, həm də
Xəzərin şərq sahillərindən neft resursları Azərbaycan, Gürcüstan üzərindən
keçirilir. Biz bu mövcud infrastruktur haqqında kifayət qədər danışmışıq. Bütün
bu infrastruktur göz önündədir və artıq 20 ildir ki, Bakı-Tbilisi-Ceyhan neft
kəməri uğurla fəaliyyət göstərir. Cənub Qaz Dəhlizi də ondan sonra icra
edilmişdir və bu gün bu infrastruktur, əslində, böyük coğrafiya üçün mühüm
əhəmiyyət daşıyır. Biz sonra bu dəhlizlər üzərindən nəqliyyat dəhlizlərini də
inşa etdik və bu gün nəqliyyat dəhlizlərinin genişləndirilməsi istiqamətində
işlər aparılır. Orta Dəhliz Azərbaycan və Gürcüstan üzərindən keçir. Bu bizim üçün
əsas nəqliyyat damarıdır və bunu genişləndirmək üçün əlavə səylər də göstərilir
və göstəriləcəkdir”.
Ümumilikdə reallaşan
səfər Azərbaycan Gürcüstan münasibətlərinin təkcə ikitərəfli çərçivədə deyil,
bütövlükdə regionun gələcəyi üçün mühüm əhəmiyyət kəsb edən strateji əməkdaşlıq
platforması olduğunu deməyə əsas verir.
Mətanət Səfərli,
YAP Nəsimi Rayon
Təşkilatının əməkdaşı
