İran hakimiyyəti Hörmüz boğazından keçən neft tankerlərindən hər barelə görə 1 dollar rüsum almağı, həmçinin istənilən gəmiyə baxış keçirmək imkanına malik olmağı planlaşdırır.
AFN.az xəbər verir ki, bu barədə "Financial Times" (FT) qəzetinə İranın Neft, Qaz və Neft-Kimya Məhsulları İxracatçıları Birliyinin nümayəndəsi Həmid Hüseyni məlumat verib və ödənişin bitkoinlə qəbul ediləcəyini dəqiqləşdirib.
"İran boğaz vasitəsilə nələrin daşındığına nəzarət etməlidir ki, bu iki həftəlik atəşkəs rejimi dövründən silah daşınması üçün istifadə olunmasın", — deyə Hüseyni bildirib. O əmin edib ki, istənilən gəmi boğazdan keçə bilər, lakin xəbərdarlıq edib ki, yoxlama vaxt aparacaq.
Hüseyni qeyd edib ki, hər bir tanker daşıdığı yük barədə məlumatları e-poçt vasitəsilə hakimiyyət orqanlarına göndərməlidir, bundan sonra İran onlara kriptovalyuta ilə ödənilməli olan rüsumun məbləğini bildirəcək. O vurğulayıb ki, tarif hər barel üçün 1 dollar təşkil edir, boş tankerlər isə sərbəst keçə bilər.
"Məktub alındıqdan və İran qiymətləndirməni başa çatdırdıqdan sonra gəmilərə bitkoinlə ödəniş etmək üçün bir neçə saniyə vaxt veriləcək ki, bu da sanksiyalara görə ödənişin izlənilməsinin və ya müsadirə edilməsinin qeyri-mümkünlüyünə zəmanət verir", — deyə Hüseyni izah edib. O xəbərdarlıq edib ki, icazəsiz keçməyə cəhd edən istənilən gəmi məhv ediləcək.
Qeyd edək ki, Hörmüz boğazı vasitəsilə neft daşınması üçün əsasən 1,5–2 milyon barel neft tutumuna malik iri tankerlərdən istifadə olunur.
