BAKI, TurkicWorld, Orxan Qədirzadə
Türkiyə Respublikası Xarici İşlər Nazirliyi, ABŞ və İran arasında əldə olunan 14 günlük atəşkəs qərarı ilə bağlı rəsmi bəyanat yayıb. Ankara silahların susmasını müsbət addım kimi qiymətləndirərək, bölgədə qalıcı sülhün tərəfdarı olduğunu vurğulayıb.
TurkicWorld xəbər verir ki, 2026-cı il aprelin 8-də paylaşılan rəsmi mətndə Türkiyənin bu kritik diplomatik gedişatla bağlı mövqeyi və gözləntiləri aydın şəkildə ifadə olunub.
Türkiyə Xarici İşlər Nazirliyinin açıqlamasında bu məqamlar xüsusi qeyd edilib:
Türkiyə tərəflər arasında əldə olunan keçici atəşkəs qərarını alqışlayır və bunu gərginliyin azaldılması üçün mühüm imkan hesab edir.
Ankara vurğulayıb ki, keçici atəşkəs döyüş bölgəsində tam və qüsursuz şəkildə tətbiq olunmalıdır. Tərəflərin razılaşmaya sadiq qalması ümid edilir.
Bəyanatda qeyd olunub ki, qalıcı sülhə gedən yol ancaq dialoq, diplomatiya və qarşılıqlı etimad vasitəsilə mümkündür.
Türkiyə aprelin 10-da Pakistanda keçiriləcək müzakirələrin uğurla nəticələnməsi üçün hər növ dəstəyi verməyə hazır olduğunu bəyan edib.
Türkiyə bu çətin prosesdə vasitəçilik rolunu üstlənən "qardaş Pakistanı" uğurlu diplomatik səylərinə görə təbrik edib.
