Pakistanın Baş naziri Şahbaz Şərif, İran ilə Amerika Birləşmiş Ştatları və onun müttəfiqlərinin, başda Livan olmaqla bölgədəki münaqişələri əhatə edən dərhal atəşkəs barədə razılığa gəldiyini açıqlayıb.
"Cebheinfo.az" xəbər verir ki, Şərif bildirib ki, bu qərar dərhal qüvvəyə minib.
O, sosial media hesabında etdiyi paylaşımda bunları deyib:
“Ən səmimi təvazökarlıqla bildirirəm ki, İran İslam Respublikası ilə Amerika Birləşmiş Ştatları və müttəfiqləri Livan və digər bölgələr daxil olmaqla hər yerdə dərhal atəşkəs barədə razılığa gəliblər, bu qərar dərhal qüvvəyə minir. Bu müdrik addımı səmimiyyətlə alqışlayıram və hər iki tərəfin liderlərinə dərin təşəkkürümü bildirirəm.
Bütün fikir ayrılıqlarını həll edəcək yekun razılaşma üçün danışıqları davam etdirmək məqsədilə hər iki tərəfin heyətlərini 10 aprel 2026-cı il tarixində İslamabada dəvət edirəm.
Hər iki tərəf böyük müdriklik və anlayış nümayiş etdirib və sülh və sabitliyin təmin olunması üçün konstruktiv şəkildə fəaliyyət göstərməyə davam edir.
"İslamabad danışıqları"nın davamlı sülhün təmin olunmasında uğurlu olacağına ürəkdən ümid edirəm və yaxın günlərdə daha çox müsbət xəbərlər paylaşmağı arzulayıram!”
