BAKI, TurkicWorld, Orxan Qədirzadə
ABŞ Prezidenti Donald Tramp İrana qarşı hərbi əməliyyatların dayandırıldığını və tərəflər arasında iki həftəlik atəşkəs elan edildiyini bəyan edib.
TurkicWorld xəbər verir ki, bu qərar, Trampın İrana verdiyi ultimatuumun bitməsinə dəqiqələr qalmış Pakistanın vasitəçiliyi ilə əldə olunub.
"Biz İran tərəfindən 10 bəndlik bir təklif aldıq və bunun müzakirə üçün əlverişli bir əsas olduğuna inanırıq. İrana qarşı bombardmanların və hücumların iki həftə müddətinə dayandırılmasına razılıq verdim. Bu müddət yekun sülh sazişinin tamamlanmasına imkan verəcək."-deyə, Prezident Tramp "Truth Social" platformasında verdiyi açıqlamada bildirib.
Ağ Evin məlumatına görə, ABŞ İranda bütün hərbi məqsədlərinə artıq nail olub və onları ötüb. Atəşkəs rejimi İranın Hörmüz boğazını gəmilərin hərəkəti üçün açdığı andan qüvvəyə minəcək. ABŞ rəsmiləri qeyd edirlər ki, atəşkəs əmrlərinin İran İslam İnqilabı Keşikçiləri Korpusunun (SEPAH) aşağı rütbəli bölmələrinə çatması müəyyən vaxt apara bilər.
İranın 10 bəndlik təklifi və "Zəfər" bəyanatı
İranın Milli Ali Təhlükəsizlik Şurası bəyan edib ki, rəsmi Tehran "böyük qələbə" qazanaraq ABŞ-ı öz şərtlərini qəbul etməyə məcbur edib. İranın təklif etdiyi 10 bəndlik plan aşağıdakıları nəzərdə tutur:
Hücum etməmək öhdəliyi;
Hörmüz boğazı üzərində İranın nəzarətinin qalması (keçidlərin İran qüvvələri ilə koordinasiya edilməsi);
Uranın zənginləşdirilməsi hüququnun tanınması;
Bütün sanksiyaların ləğvi və dondurulmuş aktivlərin qaytarılması;
Müharibə zərərləri üçün kompensasiya ödənilməsi;
ABŞ qoşunlarının regiondan çıxarılması;
Livan da daxil olmaqla bütün cəbhələrdə müharibənin dayandırılması.
Xarici işlər naziri Abbas Araqçı qeyd edib ki, hücumlar dayandırılarsa, İran Silahlı Qüvvələri də müdafiə əməliyyatlarını dayandıracaq və Hörmüz boğazından təhlükəsiz keçid iki həftəlik mümkün olacaq.
Livan və İsrailin mövqeyi
Livan tərəfindən rəsmi bəyanat gəlməsə də, İsrailin "Yedioth Ahronoth" qəzeti və "Kanal 12" televiziyası atəşkəsin Livanı da əhatə etdiyini təsdiqləyib. Bildirilir ki, İran atəşkəs üçün Livan cəbhəsinin də daxil edilməsini əsas şərt kimi qoyub. İsrail isə ABŞ-ın vasitəçiliyi ilə hücumları iki həftə müddətinə dayandırmağa razılıq verib, lakin İsrail rəsmilərinin bu razılaşmadan narahat olduğu vurğulanır.
İslamabad Sammiti: Cümə günü ilk birbaşa görüş
Pakistanın Baş naziri Məhəmməd Şahbaz Şərif tərəflərin dərhal atəşkəs barədə razılığa gəldiyini təsdiqləyib. O, ABŞ və İran nümayəndə heyətlərini 11 aprel (cümə günü) İslamabada dəvət edib. Bu görüş müharibənin başlanmasından bəri amerikalı və iranlı rəsmilər arasında ilk birbaşa (üz-üzə) danışıqlar olacaq.
Pakistanın "son on beş dəqiqə" təşəbbüsü Trampın ultimatumunu iki həftə uzatmağa və Hörmüz boğazını "xoş məram nümayişi" kimi açmağa əsaslanır.
