10 aprel saat 18:00-da teatrsevərləri maraqlı və düşündürücü bir səhnə əsəri gözləyir. Azərbaycan peşəkar dramaturgiyasının banisi Mirzə Fətəli Axundzadə tərəfindən qələmə alınmış “Hekayəti müsyö Jordan və dərviş Məstəlişah” bir hissəli komediyası yenidən səhnəyə qoyulur. Klassik irsimizin parlaq nümunələrindən olan bu əsər öz aktuallığını qoruyaraq tamaşaçılara həm gülüş, həm də dərin məna və mesajlar təqdim edir.
Tamaşanın quruluşçu rejissoru Gümrah Ömər, quruluşçu rəssamı isə Rəşid Şerifdir. Onların yaradıcı yanaşması nəticəsində səhnədə dövrün koloritini əks etdirən maraqlı və dinamik bir atmosfer yaradılıb.
Səhnə əsərində əsas rolları Azərbaycanın tanınmış sənətçiləri canlandırırlar. Xalq artisti Pərvanə Qurbanova, əməkdar artistlər Elxan Yunis və İlham Hüseynov, həmçinin aktyorlar Samir Abbasov, Günay Cabbarova, Murad Rüzigar, Zəminə Cəfərova və Rauf Hüseynov öz peşəkar oyunları ilə tamaşaya xüsusi rəng qatırlar.
Qeyd edək ki, tamaşa Gəncə Dövlət Milli Dram Teatrı səhnəsində nümayiş olunacaq. Klassik dramaturgiyanın incə yumoru və sosial mesajlarını yaşadan bu səhnə işi tamaşaçılar üçün unudulmaz bir axşam vəd edir.
Biletləri teatrın kassasından əldə edə bilərsiniz. Bu maraqlı səhnə əsərini qaçırmayın!
